ఇరాన్ చర్చలపై ట్రంప్ నమ్మకం కోల్పోతున్నా: ‘వాళ్లు అబద్ధాలు చెప్తారు’

ఇరాన్‌తో అణు ఒప్పందానికి సంబంధించి జరుగుతున్న చర్చలపై అమెరికా మాజీ అధ్యక్షుడు డొనాల్డ్ ట్రంప్ తీవ్ర అసంతృప్తి వ్యక్తం చేశారు. ఇరాన్ నాయకత్వం నిజాయితీగా వ్యవహరించడం లేదని, తరచూ అబద్ధాలు చెప్తూ తనను తప్పుదోవ పట్టిస్తోందని ఆయన ఆరోపించారు. ఈ కారణాలతోనే ఇరాన్‌తో చర్చలపై తనకు నమ్మకం సన్నగిల్లుతోందని ట్రంప్ స్పష్టం చేశారు.

ఈ విషయాన్ని ట్రంప్ తన అధికారిక బృందంతో కలిసి మీడియాతో మాట్లాడుతూ వెల్లడించారు. ‘వాళ్లు మాట్లాడేందుకు ఎప్పుడూ సిద్ధమే. కానీ ఇచ్చిన మాటను నిలబెట్టుకోరు. అణు విషయంపై ఏడు గంటలు చర్చించినా, ఆ తర్వాత మేం అణు గురించి మాట్లాడలేదని పబ్లిక్‌గా చెప్తారు. ఇలాంటి చర్యలు చూస్తే నాకు కోపం తప్ప మరేమీ రాదు. నెమ్మదిగా వారిపై నమ్మకం కోల్పోతున్నా’ అని ట్రంప్ వ్యాఖ్యానించారు.

ఇదిలా ఉండగా, ఇరాన్ ఆర్థిక వ్యవస్థ తీవ్ర సంక్షోభంలో చిక్కుకుందని ట్రంప్ ప్రభుత్వం వెల్లడించింది. 2025 డిసెంబర్‌లో ఇరాన్‌లోని అతిపెద్ద బ్యాంకు కుప్పకూలిపోయిందని, దీంతో సెంట్రల్ బ్యాంకు డబ్బు ప్రింట్ చేయాల్సి వచ్చిందని అధికారులు తెలిపారు. ఫలితంగా దేశంలో ద్రవ్యోల్బణం ఏకంగా 180 శాతానికి చేరుకుందని, సైనికులకు జీతాలు చెల్లించలేని పరిస్థితి ఏర్పడిందని వివరించారు.

ట్రంప్ ఆదేశాల మేరకు అమెరికా ప్రభుత్వం ప్రపంచవ్యాప్తంగా ఇరాన్ ఆస్తుల కోసం గాలింపు ముమ్మరం చేసింది. ఈ ఆస్తుల నుంచి వచ్చే నిధులను ఇరాన్ ప్రజలకు, ఇరాన్ చేతిలో నష్టపోయిన అమెరికన్లకు, యుఎస్ఎస్ కోల్, లెబనాన్ బ్యారక్స్ దాడుల బాధితులకు పంపిణీ చేయనున్నట్లు తెలిపారు.

ఇరాన్ సైనిక సామర్థ్యంపై కూడా ట్రంప్ కీలక వ్యాఖ్యలు చేశారు. గత నాలుగైదు నెలలతో పోలిస్తే ఇరాన్ వద్ద క్షిపణుల సంఖ్య గణనీయంగా తగ్గిపోయిందని, వారి తయారీ సామర్థ్యం, డ్రోన్ సామర్థ్యం దాదాపు పూర్తిగా నశించాయని చెప్పారు. అయినా, ఒక్క క్షిపణి ఉన్నా అది చాలా ప్రమాదకరమేనని హెచ్చరించారు.

కాగా, ఇరాన్‌తో చర్చలు ఎవరు నిర్వహిస్తున్నారన్న ప్రశ్నకు ట్రంప్ స్పందిస్తూ, స్టీవ్ విట్‌కాఫ్, జేడీ వాన్స్, మార్కో రూబియో లాంటి అత్యుత్తమ వ్యక్తులు ఇందులో పాల్గొంటున్నారని, అయితే చర్చలు జరగడం లేదని స్పష్టం చేశారు. ఇరాన్ వైఖరిపై తన అసహనం పెరుగుతోందని, చర్చల భవిష్యత్తుపై సందిగ్ధత నెలకొందని ఆయన సంకేతాలిచ్చారు.