ఇరాన్‌పై అమెరికా వైమానిక దాడులు: 'నేర్చుకోకపోతే ఉనికే లేకుండా చేస్తాం' అన్న ట్రంప్

ఇరాన్ క్షిపణి, డ్రోన్ నిల్వ స్థావరాలపై అమెరికా వైమానిక దాడులు చేసిందని అధ్యక్షుడు డొనాల్డ్ ట్రంప్ ప్రకటించారు. హోర్ముజ్ జలసంధి తీరంలో ఉన్న క్షిపణి, డ్రోన్ స్టోరేజ్ లొకేషన్లు, కోస్టల్ రాడార్ సైట్లను లక్ష్యంగా చేసుకున్నట్లు తెలిపారు. కాల్పుల విరమణ ఒప్పందాన్ని ఇరాన్ మరోసారి ఉల్లంఘించడంతో ఈ దాడులు జరిపినట్లు ఆయన పేర్కొన్నారు. "ఇరాన్ ఎప్పటికీ నేర్చుకోదు. మేము సహేతుకంగా వ్యవహరించలేని పరిస్థితి వస్తే, మేము విజయవంతంగా మొదలుపెట్టిన పనిని సైనికపరంగా పూర్తి చేయవలసి వస్తుంది. అలా జరిగితే, ఇస్లామిక్ రిపబ్లిక్ ఆఫ్ ఇరాన్ ఉనికిలో ఉండదు" అని ట్రంప్ హెచ్చరించారు. అమెరికా, ఇరాన్ మధ్య కుదిరిన ఎంఓయూ (అవగాహన ఒప్పందం) పూర్తిస్థాయిలో అమలు కావడం లేదన్న అసంతృప్తి నేపథ్యంలో ఈ బెదిరింపులు వెలువడ్డాయి. హోర్ముజ్ జలసంధి గుండా నౌకల రాకపోకలు ఆశించిన స్థాయిలో జరగకపోవడం, ఐఆర్జీసీ (ఇరాన్ రివల్యూషనరీ గార్డ్ కార్ప్స్) నియంత్రణ కొనసాగుతుండటం ప్రధాన ఉద్రిక్తత అంశాలుగా నిలుస్తున్నాయి. నిర్దేశిత మార్గంలో కాకుండా ప్రయాణించే నౌకలపై దాడులు జరుగుతున్నాయని, దీనికి ప్రతిగా అమెరికా ఎదురుదాడులు చేస్తోందని విశ్లేషకులు చెబుతున్నారు. ఇటీవల జరిగిన దాడుల్లో హోర్ముజ్ తీరంలో 10 మంది పోలీసులను అమెరికా లక్ష్యంగా చేసుకున్నట్లు సమాచారం.