భారీ వర్షాల నేపథ్యంలో విద్యుత్ శాఖ అప్రమత్తం: విద్యుత్ సరఫరా అంతరాయం లేకుండా చర్యలు

భారీ వర్షాలు, వరదల నేపథ్యంలో తెలంగాణలో విద్యుత్ శాఖ అప్రమత్తమైంది. విద్యుత్ సరఫరాకు అంతరాయం లేకుండా చూసుకోవాలని TSSPDCL CMD జితీశ్ వి. పాటిల్ అధికారులను ఆదేశించారు.

క్షేత్ర స్థాయి సిబ్బంది వెంటనే అందుబాటులో ఉండాలన్నారు. గతంలో చెట్ల కొమ్మలు తొలగించడం వల్ల ట్రిప్పింగ్ 20-30 శాతం తగ్గిందని, రాష్ట్రవ్యాప్తంగా 168 పవర్ అంబులెన్సులు సిద్ధంగా ఉన్నాయని ఆయన వివరించారు.

వర్షాల సమయంలో విద్యుత్ స్తంభాలు నీటికి కొట్టుకుపోకుండా ఉండేందుకు పోలీస్, మున్సిపల్, ట్రాఫిక్ శాఖలతో కమాండ్ కంట్రోల్ సెంటర్ ద్వారా సమన్వయం చేస్తున్నామని చెప్పారు. స్తంభాల ఇన్సులేటర్లపై ఇన్సులేషన్ కోటింగ్ ప్రయోగం చేస్తున్నామన్నారు.

జూరాల ప్రాజెక్టు నుంచి హైడల్ విద్యుత్ అందుతుండడంతో ప్రస్తుతం విద్యుత్ కొరత లేదని, ఉత్తర తెలంగాణ వర్షాలతో సాగునీటి అవసరాలు తీరుతాయని CMD తెలిపారు. పోల్ టు పోల్ మ్యాపింగ్ పూర్తి చేసి, వినియోగదారుల ఫిర్యాదులకు సత్వరం స్పందిస్తున్నామని, గత వారం 21 వేల కాల్స్ వచ్చినా ఒకేసారి రిజిస్టర్ అయ్యాయని వివరించారు.

హైదరాబాద్ నగరంలో 10 మీటర్ల కంటే ఎత్తు ఉన్న భవనాలకు ఆక్యుపెన్సీ సర్టిఫికెట్ (OC) ఉంటేనే రెగ్యులర్ విద్యుత్ సరఫరా ఇస్తామని, OC లేకుండా తాత్కాలిక సరఫరా మాత్రమే ఇస్తామని స్పష్టం చేశారు. నిబంధనలు పాటించాలని పౌరులకు విజ్ఞప్తి చేశారు.

విద్యుత్ సరఫరా నిరంతరం ఉండేలా అన్ని చర్యలు తీసుకుంటున్నామని CMD పాటిల్ హామీ ఇచ్చారు.