టిటిడి నిత్యాన్నదానం: 2025లో ఇప్పటికే 4.40 కోట్ల మందికి ఉచిత భోజనం

తిరుమల తిరుపతి దేవస్థానం (టిటిడి) నిర్వహిస్తున్న నిత్యాన్నదాన పథకం కొత్త రికార్డు సృష్టించింది. 2025 జనవరి నుంచి మే నెలాఖరు వరకు 4.40 కోట్ల మందికి పైగా భక్తులకు ఉచిత భోజనం అందించినట్లు టిటిడి వెల్లడించింది.

ఈ మే నెలలోనే 92 లక్షలకు పైగా సర్వింగ్‌లు నమోదయ్యాయి. సాధారణ రోజుల్లో 80 వేల నుంచి 90 వేల మంది అన్నప్రసాదం స్వీకరిస్తుండగా, వారాంతాల్లో ఈ సంఖ్య లక్ష దాటుతుంది.

మాతృశ్రీ తరిగొండ వెంగమాంబ అన్నప్రసాద కేంద్రం, అక్షయ కిచెన్, నారాయణగిరి షెడ్లు, PAC కేంద్రాలతో సహా పలు ప్రాంతాల్లో భక్తులకు నిరంతరం భోజనం అందిస్తున్నారు. ప్రతిరోజు సుమారు 15.8 టన్నుల బియ్యం, వేల కిలోల పప్పులు, నూనె, బెల్లం వంటి సామాగ్రిని ఉపయోగిస్తున్నారు.

భక్తుల విరాళాలతో నడిచే శ్రీ వెంకటేశ్వర అన్నప్రసాదం ట్రస్ట్ వద్ద ప్రస్తుతం రూ.2,500 కోట్లకు పైగా ఫిక్స్డ్ డిపాజిట్లు ఉన్నాయి. సేవల విస్తరణలో భాగంగా వకుళమాత సెంట్రలైజ్డ్ కిచెన్, 1500 మంది ఒకేసారి భోజనం చేసే PAC5 డైనింగ్ హాల్ ప్రారంభించారు. రోజుకు లక్షలాది మందికి ఆహారం తయారు చేసే అత్యాధునిక ఆటోమేటెడ్ కిచెన్ నిర్మాణం కొనసాగుతోంది.

1985లో ప్రారంభమైన ఈ పథకం తిరుమలకు వచ్చే భక్తులకు అల్పాహారం, మధ్యాహ్న భోజనం, రాత్రి భోజనంతో పాటు పాలు, టీ, కాఫీ కూడా ఉచితంగా అందిస్తోంది.