తుంగభద్ర డ్యాం 33 గేట్ల పునరుద్ధరణ పనులు ప్రారంభం

తుంగభద్ర డ్యాం 33 గేట్ల పునరుద్ధరణ పనులు శుక్రవారం ప్రారంభమయ్యాయి. ఈ కార్యక్రమంలో తెలంగాణ సీఎం రేవంత్ రెడ్డి, ఆంధ్రప్రదేశ్ సీఎం చంద్రబాబు నాయుడు, కర్ణాటక ఉప ముఖ్యమంత్రి డీకే శివకుమార్ పాల్గొన్నారు.

రేవంత్ రెడ్డి మాట్లాడుతూ, ఈ 33 గేట్ల పునరుద్ధరణతో రాయలసీమ, పాలమూరు జిల్లాల్లోని లక్షలాది మంది రైతులకు ప్రయోజనం చేకూరుతుందన్నారు. బల్లారి, అనంతపూర్, కర్నూల్, గద్వాల, అలంపూర్ ప్రాంతాల్లో సాగు, తాగునీటి సమస్యలు తీరుతాయని ఆశాభావం వ్యక్తం చేశారు.

గద్వాల, అలంపూర్ ప్రాంత రైతులకు రాజోలి బండ డైవర్షన్ స్కీమ్ ద్వారా 15.99 టీఎంసిల నీరు కేటాయించారని, కానీ ప్రస్తుతం ఐదు నుంచి ఆరు టీఎంసీలే అందుతోందని తెలిపారు. మిగిలిన 10 టీఎంసిల నీళ్లు డ్యాం లో మట్టి పేరుకుపోవడం, నీటి తరలింపు సమస్యల వల్ల రావడం లేదని వివరించారు.

కేంద్ర జలశక్తి మంత్రి సీఆర్ పాటిల్ పై సీఎం రేవంత్ ప్రశంసలు వెలిబుచ్చారు. ఆయన చాలా తక్కువగా మాట్లాడతారని, సమస్యలను వేగంగా పరిష్కరించే నైపుణ్యం ఉందని అన్నారు. మోడీ నుంచి ఎవరైనా సమస్య చెప్పగానే, పాటిల్ వెంటనే స్పందిస్తారని, ఈరోజు కేంద్ర మంత్రి హాజరు కావడంతో సమస్యలకు శాశ్వత పరిష్కారం దొరుకుతుందని ఆయన నమ్మకం వ్యక్తం చేశారు.

రేవంత్ రెడ్డి తరతరాలుగా తాగునీటి, సాగునీటి కోసం ప్రజలు వలసలు వెళ్తున్నారని, ఈ పునరుద్ధరణతో ఆ సమస్యకు పరిష్కారం లభిస్తుందన్నారు. మూడు తరాల సమస్యను ఈరోజు పరిష్కరించే దిశగా అడుగు పడిందని చెప్పారు.