గాంధీ భవన్ వద్ద తుంగతుర్తి నేతల పోటాపోటీ నిరసనలు; జగ్గారెడ్డి పరిశీలన

హైదరాబాద్‌లోని గాంధీ భవన్ ముందు తుంగతుర్తి నియోజకవర్గానికి చెందిన కాంగ్రెస్ నాయకులు పోటాపోటీ ధర్నాలు చేపట్టారు. గత రెండు రోజులుగా పార్టీ పరిశీలకుడిగా నియమితులైన జగ్గారెడ్డి అక్కడి నాయకులతో సమావేశాలు నిర్వహిస్తున్నారు.

తుంగతుర్తి ఎమ్మెల్యే మండిపల్లి సామ్యూల్‌కు అనుకూలంగా ఆయన మద్దతుదారులు నిరసన చేపట్టగా, పాత కాంగ్రెస్ నాయకులు పక్కన బడుతున్నారని, ఎమ్మెల్యే వర్గానికే పదవులు ఇస్తున్నారని మరో వర్గం ఆరోపించింది. నియోజకవర్గంలో నాయకుల మధ్య ఘర్షణలు రాళ్ల దాడుల వరకు వెళ్ళాయి.

ఈ నేపథ్యంలో కాంగ్రెస్ పార్టీ జగ్గారెడ్డిని పరిశీలకుడిగా నియమించింది. ఆయన ఇప్పటికే ఎంపీ చామల, డీసీసీ అధ్యక్షుడు, మండల అధ్యక్షుల నుంచి వివరాలు సేకరించారు. ఇవాళ ఎమ్మెల్యే సామ్యూల్‌తో 45 నిమిషాల పాటు భేటీ అనంతరం, ఎమ్మెల్యే నియమించిన మండల అధ్యక్షులతోనూ చర్చించారు. నియోజకవర్గంలో తొమ్మిది మండలాలు ఉన్నాయి.

జగ్గారెడ్డి ఈ వారంలో అన్ని వర్గాలతో చర్చించిన తర్వాత, పార్టీ అధిష్టానానికి నివేదిక సమర్పించనున్నారు. ఆ నివేదిక ఆధారంగా ఎవరిపైనైనా క్రమశిక్షణ చర్యలు తీసుకోవచ్చని పార్టీ వర్గాలు తెలిపాయి. ఈ పరిణామం తుంగతుర్తికి చెందిన కాంగ్రెస్ శ్రేణుల్లో ఉత్కంఠ రేపింది.