తుని చిన్నారి జ్ఞానేశ్వరి కేసు: పెంపుడు కుక్క అనారోగ్యంతో మృతి – ఫోరెన్సిక్ నివేదిక

కాకినాడ జిల్లా తుని మండలం సీహెచ్ అగ్రహారంలో రెండేళ్ల చిన్నారి జ్ఞానేశ్వరి అదృశ్యమైన కేసులో కీలక మలుపు చోటు చేసుకుంది. పోలీసులు అదుపులోకి తీసుకున్న పెంపుడు కుక్కను పరీక్షించగా, అది అనారోగ్యంతో మరణించినట్లు ఫోరెన్సిక్ ల్యాబ్ నివేదికలో వెల్లడైంది.

పాపతోపాటు మాయమైన కుక్కను 10వ తేదీన పట్టుకున్నారు. పోలీసులు దానికి జీపీఎస్ ట్రాకర్ అమర్చి వదిలిపెట్టారు. 13వ తేదీన అది కుప్పకూలి మరణించింది. పోస్టుమార్టం అనంతరం విశాఖ ఫోరెన్సిక్ ల్యాబ్కు నమూనాలు పంపించారు. ఆహారం తీసుకోకపోవడం వల్ల అనారోగ్యానికి గురై మృతి చెందినట్లు నివేదిక స్పష్టం చేసింది.

చిన్నారి ఆచూకీ కోసం పోలీసులు అన్ని కోణాల్లో దర్యాప్తు కొనసాగిస్తున్నారు. సాంకేతిక సమాచారంతో పాటు క్షేత్రస్థాయిలో విచారణ జరుగుతోంది. చిన్నారి అదృశ్యమై 20 రోజులు కావడంతో తల్లి భవాని అనారోగ్యానికి గురయ్యారు. ప్రస్తుతం ఆమె పరిస్థితి నిలకడగా ఉన్నట్లు పోలీసులు తెలిపారు.