తుని చిన్నారి జ్ఞానేశ్వరి కోసం ఎన్డీఆర్ఎఫ్ బృందాలను రంగంలోకి దించాలని పవన్ కళ్యాణ్ ఆదేశం

కాకినాడ జిల్లా తుని మండలం సీహెచ్ అగ్రహారంలో ఈ నెల 6వ తేదీన అదృశ్యమైన రెండేళ్ల చిన్నారి సుంకర జ్ఞానేశ్వరి కోసం గాలింపు చర్యలు ముమ్మరం చేశారు. ఉపముఖ్యమంత్రి పవన్ కళ్యాణ్ ఈ కేసులో ఎన్డీఆర్ఎఫ్, ఎస్డీఆర్ఎఫ్ బృందాలను రంగంలోకి దించాలని ఆదేశించారు.

పోలీసులు ఎనిమిది రోజులుగా గాలింపు కొనసాగిస్తున్నారు. చిన్నారిని కొండ ప్రాంతం నుంచి తీసుకెళ్లిన అవకాశంపై దర్యాప్తు చేస్తున్నారు. ఈ ఘటనలో కీలకంగా భావించిన పెంపుడు కుక్క శనివారం మృతి చెందడం పోలీసు దర్యాప్తును మరింత క్లిష్టతరం చేసింది. జ్ఞానేశ్వరి కనిపించకుండా పోయినప్పుడు ఆ కుక్క ఆమె వెంట ఉంది. దాని మెడకు జీపీఎస్ ట్రాకర్ అమర్చి పరిశీలించినా చిన్నారి ఆచూకీ లభించలేదు.

పోలీసులు సీసీ కెమెరా ఫుటేజ్, ఏడు టవర్ల పరిధిలోని ఫోన్ కాల్స్ విశ్లేషించారు. అనుమానాస్పద నంబర్లను పిలిపించి వారి స్టేట్మెంట్లు నమోదు చేస్తున్నారు. చిన్నారి తండ్రికి ఎవరితోనైనా వివాదాలు ఉన్నాయా అన్న కోణంలోనూ విచారణ జరుగుతోంది.

ఐజీ అశోక్ కుమార్, జిల్లా ఎస్పీ బిందు మాధవ్ దర్యాప్తు బృందాలతో టెలీ కాన్ఫరెన్స్ నిర్వహించి పలు సూచనలు చేశారు. మృత కుక్కకు పోస్ట్మార్టం నిర్వహించి మరణానికి గల కారణాలు తెలుసుకునే ప్రయత్నం చేస్తున్నారు.

ఉపముఖ్యమంత్రి పవన్ కళ్యాణ్ కాకినాడ ఎస్పీకి ఫోన్ చేసి దట్టమైన అడవుల్లో వెళ్ళగలిగే నిపుణుల సహాయం తీసుకోవాలని సూచించారు. చిన్నారి ఆచూకీ కోసం మరిన్ని బృందాలను వినియోగించుకోవాలని ఆదేశించారు. పోలీసులు అన్ని కోణాల్లో దర్యాప్తు కొనసాగిస్తున్నారు.