అయోధ్య రామాలయ వివాదాలపై విశ్లేషకుడు తురగా శ్రీరామ్ ప్రశ్నలు

అయోధ్య రామ మందిరానికి సంబంధించి ఇటీవల దేశవ్యాప్తంగా చర్చలు జరుగుతున్నాయి. విరాళాల దుర్వినియోగం, సభ్యుల రాజీనామాలు వంటి వర్తమానాల నేపథ్యంలో రాజకీయ విశ్లేషకుడు తురగా శ్రీరామ్ కొన్ని ప్రశ్నలను లేవనెత్తారు.

గత వారాల్లో ఆలయ ట్రస్ట్‌లో ఇద్దరు కీలక సభ్యులు రాజీనామా చేశారు. వారి రాజీనామాలను ట్రస్ట్ ఆమోదించింది. విరాళాలను వడ్డీలకు ఇవ్వడం, స్టాక్ మార్కెట్‌లో పెట్టుబడి పెట్టడం వంటి ఆరోపణలు వెలుగులోకి వచ్చాయి. ఈ పరిణామాలు హిందూ భక్తులను ఆందోళనకు గురి చేస్తున్నాయి.

ఈ సంఘటనలకు మూలం 2020లో శంకుస్థాపన సమయంలో నిర్ణయించిన ముహూర్తం సరిగా లేకపోవడమే కారణమా అని తురగా శ్రీరామ్ అనుమానం వ్యక్తం చేశారు. ఆ రోజు ముహూర్తంపై శంకరాచార్యులు, పండితుల అభ్యంతరాలు ఉన్నాయని గతంలో వార్తలు వచ్చాయని గుర్తు చేశారు.

ఆలయంపై వస్తున్న అపకీర్తిని తొలగించేందుకు పండితులతో చర్చించి, పరిహార చర్యలు వెంటనే చేపట్టాలని ఆయన సూచించారు. లేకుంటే ప్రపంచవ్యాప్తంగా హిందువుల భావోద్వేగాలను దెబ్బతీసే ప్రమాదం ఉందని హెచ్చరించారు.