పుణె లోహగడ్ కోట వద్ద వ్యాపారవేత్త హత్య కేసులో ఇద్దరు అరెస్ట్

పుణె జిల్లాకు చెందిన రియల్ ఎస్టేట్ వ్యాపారవేత్త కేతన్ అగర్వాల్ హత్య కేసులో పుణె రూరల్ పోలీసులు ఇద్దరు నిందితులను అరెస్ట్ చేశారు. నిందితులు సియా గోయల్, ఆమె ప్రియుడు చేతన్ చౌదరి. కేతన్‌తో సియా వివాహ ఒప్పందం జరిగింది. కేతన్ ఆస్తిపై కన్నేసి, ప్రియుడితో కలిసి ఈ హత్య పథకం రచించినట్లు పోలీసులు తెలిపారు.

జూన్‌లో బాలీ ట్రిప్‌కు వెళుతుండగా, కేతన్ పాస్‌పోర్ట్ మాయమైంది. దీంతో ట్రిప్ రద్దైంది. బాలీ ప్రయాణం రద్దు అయిన తర్వాత, సియా కేతన్‌ను లోహగడ్ కోటకు తీసుకువెళ్లింది. జూన్ 14న కోట వద్ద 400 అడుగుల లోయలోకి తోసేసింది. కానీ కేతన్ పొద పట్టుకుని ప్రాణాలతో బయటపడ్డాడు. సియా భయపడుతున్నట్టు నటిస్తూ 'పాము' అని కేకలు వేసి, కేతన్‌ను కాపాడినట్లు నాటకం ఆడిందని పోలీసులు తెలిపారు.

జూన్ 18న సియా మళ్లీ కేతన్‌ను లోహగడ్ కోటకు తీసుకెళ్లింది. ఈసారి చేతన్ కూడా అక్కడికి చేరుకున్నాడు. గాలులు బలంగా వీస్తున్న సమయంలో, కేతన్ ఫోటో తీస్తుండగా, సియా, చేతన్ ఇద్దరూ కలిసి అతన్ని లోయలోకి తోసేశారు. కేతన్ 400 అడుగుల లోతుకు పడిపోయి మృతి చెందాడు.

సియా మొదట పోలీసులకు యాక్సిడెంటల్ డెత్ అని ఫిర్యాదు చేసింది. గాలులకు కేతన్ జారిపడ్డాడని చెప్పింది. కానీ పోలీసులకు అనుమానం వచ్చింది. ఎస్పీ సందీప్ సింగ్ గిల్ నేతృత్వంలో విచారణ ముమ్మరం చేశారు.

పోలీసులు సియా, చేతన్ మధ్య 2004 కాల్స్, 238 గంటల సుదీర్ఘ ఫోన్ కాల్స్ నమోదు చేసినట్లు గుర్తించారు. చేతన్ విచారణ సమయంలో ఫోన్‌ను ఇంట్లోనే వదిలివేయడం, ఇంటర్నెట్ ఆపివేయడంతో అనుమానాలు మరింత పెరిగాయి. సోషల్ మీడియా ఫోటోల ఆధారంగా చేతన్‌ను గుర్తించారు.

విచారణలో సియా నేరం ఒప్పుకుంది. కేతన్ ఆస్తి కోసం, ప్రియుడితో కలిసి ఉండడానికి ఈ హత్య పథకం వేసినట్లు అంగీకరించింది. ప్రస్తుతం సియా గోయల్, చేతన్ చౌదరిలను పోలీసులు జ్యుడీషియల్ కస్టడీకి పంపించారు. హత్య, కుట్ర కేసుల్లో వారిపై విచారణ కొనసాగుతోంది.