నిజామాబాద్‌లో రెండు చిరుత పులి కళేబరాలు; 5 ఏళ్లలో రాష్ట్రంలో 40+ చిరుత, 6 పులి మృతి

తాజాగా నిజామాబాద్ జిల్లాలోని కమ్మరపల్లి రేంజ్లోని భీంగల్ వద్ద, దర్పల్లి మండలంలో రెండు చిరుత పులి కళేబరాలు లభ్యమయ్యాయి.

గత ఐదేళ్లలో తెలంగాణలో 40కి పైగా చిరుతలు, 6 పెద్ద పులులు మరణించినట్లు గణాంకాలు చెబుతున్నాయి. కేంద్ర ప్రభుత్వ ‘స్టేటస్ ఆఫ్ లెప్పార్డ్స్ ఇన్ ఇండియా’ నివేదిక ప్రకారం రాష్ట్రంలో చిరుతల సంఖ్య 350కి పైగా ఉన్నా వాటి ఆవాసాలు దెబ్బతిన్నాయని పేర్కొంది.

చిరుతల మృతికి ప్రధాన కారణాలు విద్యుత్ వైర్ల ఉచ్చులు, రోడ్డు ప్రమాదాలు, విష ప్రయోగాలు. అడవి పందుల వేట కోసం పెట్టిన కరెంట్ తీగలు చిరుతలకు ప్రాణాంతకంగా మారాయి. గ్రానైట్ క్వారీలు, పోడు సాగు కోసం అడవుల నరికివేత, వేసవిలో నీటి వనరులు ఎండిపోవడం వల్ల చిరుతలు జనావాసాల్లోకి రావాల్సి వస్తోంది.

నాగర్కర్నూల్ జిల్లాలోని అమరాబాద్ టైగర్ రిజర్వ్, నల్లమల అడవుల్లో చిరుతలు అధికంగా ఉన్నాయి. ఉత్తర తెలంగాణలోని నిర్మల్, మంచిర్యాల, కుమరంభీం, ఆసిఫాబాద్ జిల్లాలతో పాటు కవల్ టైగర్ రిజర్వ్ ప్రాంతంలోనూ చిరుత కదలికలు ఎక్కువ. మెదక్, కామారెడ్డి జిల్లాల్లోని పోచారం అభయారణ్యంలో చిరుతల సాంద్రత పెరిగింది.

అటవీ శాఖ క్యాంపా నిధులతో సంరక్షణ చర్యలు తీసుకుంటామని చెప్తున్నా ఫలితం కనిపించడం లేదు. ఫీల్డ్ స్థాయి సిబ్బంది పెట్రోలింగ్ సరిగా లేదని విమర్శలు ఉన్నాయి. చిరుతల దాడిలో చనిపోయిన పశువులకు రైతులకు తక్షణ పరిహారం, అడవికి ఆనుకుని ఉన్న గ్రామాల్లో సోలార్ ఫెన్సింగ్ ఏర్పాటు, వేటగాళ్లపై కఠిన చట్టాలు అమలు చేయాల్సిన అవసరం ఉంది.