U19 ఆసియా కప్: పాకిస్తాన్ చేతిలో భారత్‌కు 3 వికెట్ల ఓటమి

U19 ఆసియా కప్ 2026లో భారత్, పాకిస్తాన్ జట్ల మధ్య జరిగిన మ్యాచ్‌లో పాకిస్తాన్ 3 వికెట్ల తేడాతో గెలిచింది. ఆదివారం అల్ అమరాట్ క్రికెట్ స్టేడియంలో ఈ మ్యాచ్ జరిగింది.

భారత్ నిర్దేశించిన 209 పరుగుల లక్ష్యాన్ని పాకిస్తాన్ 48.1 ఓవర్లలో 7 వికెట్లు కోల్పోయి చేరుకుంది. ఛేదన ప్రారంభంలో పాకిస్తాన్ 61 పరుగులకే 5 వికెట్లు కోల్పోయింది. ఆ దశలో భారత్ విజయ అవకాశాలు ఎక్కువగా కనిపించాయి.

ఆ సమయంలో క్రీజులోకి వచ్చిన హంజా జహూర్, హుసేన్ అబ్బాస్ ఆరో వికెట్‌కు 107 పరుగుల భాగస్వామ్యం నెలకొల్పారు. ఈ జోడీ మ్యాచ్ దిశను మార్చింది. హంజా జహూర్ 10 ఫోర్లు, 3 సిక్సర్లతో సెంచరీ చేశాడు. చివరి వరకు క్రీజులో నిలిచి జట్టును గెలిపించాడు.

మ్యాచ్ ముగిసిన వెంటనే హంజా జహూర్ తన జేబులో ఉన్న ఒక చిన్న కాగితాన్ని కెమెరాల ముందు చూపించాడు. ఆ కాగితంపై "ఇన్షా అల్లా, హంజా జహూర్, ఐ యామ్ ది బెస్ట్" అని రాసి ఉంది. మ్యాచ్‌కు ముందే ఆ కాగితాన్ని రాసుకుని జేబులో పెట్టుకున్నట్టు ఆయన తెలిపాడు. డగౌట్ నుంచి తనకు స్పష్టమైన సూచనలు వచ్చాయని, చివరి వరకు క్రీజులో నిలిచి మ్యాచ్‌ను ముగించడమే లక్ష్యంగా పెట్టుకున్నానని మ్యాచ్ అనంతరం ఆయన చెప్పాడు.

భారత్ తరఫున అర్జున్ రాజ్‌పూత్ సెంచరీ చేశాడు. మిగతా బ్యాటర్లు ఆశించిన స్థాయిలో రాణించకపోవడంతో భారత్ 50 ఓవర్లలో 208 పరుగులు మాత్రమే చేయగలిగింది.

ఈ టోర్నమెంట్‌లో భారత్ ఇంతకుముందు నేపాల్‌పై గెలిచింది. మంచి రన్ రేట్ ఉన్నందున మిగిలిన మ్యాచ్‌లు గెలిస్తే సెమీఫైనల్‌కు వెళ్లే అవకాశాలు ఉన్నాయి.