మహిళా ట్రైనీ IPS వేధింపుల కేసు: అరెస్టయిన ఉదయ్ కృష్ణారెడ్డిని కోర్టుకు తరలించనున్న పోలీసులు

మహిళా ట్రైనీ IPS అధికారిపై లైంగిక వేధింపుల ఆరోపణల కేసులో ట్రైనీ IPS ఉదయ్ కృష్ణారెడ్డిని పోలీసులు అరెస్ట్ చేశారు. ఆయనను నేడు (మంగళవారం) కోర్టులో హాజరుపరుస్తారు.

ఈ కేసు జూలై 18న హైదరాబాద్ అత్తాపూర్ పోలీస్ స్టేషన్లో నమోదైంది. బాధితురాలిగా ఉన్న మహిళా ట్రైనీ IPS అధికారి ఫిర్యాదు మేరకు పోలీసులు ఎఫ్ఐఆర్ నమోదు చేశారు. శిక్షణ సమయంలో ఉదయ్‌కృష్ణారెడ్డి తనను లైంగికంగా వేధించి, దాడి చేసి, వెంబడించి బెదిరించారని ఆమె ఆరోపించారు. అంతేకాకుండా, తన అనుమతి లేకుండా ప్రైవేట్ వీడియోలు తీసి, భర్తకు పంపి బెదిరింపులకు పాల్పడ్డారని కూడా ఫిర్యాదులో పేర్కొన్నారు.

జూలై 18న బాధితురాలికి వైద్య పరీక్షలు నిర్వహించగా, మెడపై గొంతు నొక్కిన ఆనవాళ్ళు, చేతికి గాయం ఉన్నట్లు నిర్ధారణ అయినట్టు అధికారులు తెలిపారు. ఈ కేసు దర్యాప్తు ఇప్పుడు హైదరాబాద్ ఉమెన్ సేఫ్టీ వింగ్‌కు బదిలీ చేయబడింది. డిసిపి లావణ్య నాయక్ దర్యాప్తు పర్యవేక్షిస్తున్నారు.

తనపై నమోదైన ఎఫ్ఐఆర్‌లను రద్దు చేయాలని కోరుతూ ఉదయ్‌కృష్ణారెడ్డి తెలంగాణ హైకోర్టును ఆశ్రయించారు. అయితే ఆయనకు మధ్యంతర రక్షణ కల్పించేందుకు కోర్టు నిరాకరించింది.