ట్రైనీ IPS ఉదయ్‌కృష్ణారెడ్డికి రెండో రోజు విచారణ; నేటితో కస్టడీ ముగియనుంది

ట్రైనీ IPS ఉదయ్‌కృష్ణారెడ్డి కస్టడీ నేటితో ముగియనుంది. మహిళా ట్రైనీ IPS అధికారి వేధింపుల కేసులో రెండో రోజు పోలీసులు విచారిస్తున్నారు. ఈ కేసులో ఉప్పరపల్లి కోర్టు రెండు రోజుల పోలీసు కస్టడీకి అనుమతించింది.

మొదటి రోజు ఉదయం 10 గంటల నుంచి సాయంత్రం 5 గంటల వరకు ఉదయ్‌కృష్ణారెడ్డిని అట్టాపూర్ పోలీసులు, ఉమెన్ సేఫ్టీ వింగ్ డిసిపి లావణ్య సహా ప్రశ్నించారు. బాధిత మహిళాతో పరిచయం, వేధింపుల ఘటనపై ఆరా తీశారు. జాతీయ పోలీస్ అకాడమీ నుంచి సుమారు 20 మంది సాక్షుల వాంగ్మూలాలు సేకరించినట్లు తెలుస్తోంది.

నేడు చివరి రోజు కస్టడీలో పోలీసులు కీలకమైన సమాచారం రాబట్టేందుకు ప్రయత్నిస్తున్నారు. గత నెల 28న అరెస్ట్ సమయంలో ఉదయ్‌కు సంబంధించిన ఒక ఫోన్ కనిపించకుండా పోయింది. ఆ ఫోన్ దొరికితే కేసు వివరాలకు సహకరిస్తుందని అధికారులు భావిస్తున్నారు. మరొక మహిళ ప్రమేయంపై కూడా విచారణ జరుగుతుంది.

సాయంత్రం 5 గంటల వరకు విచారణ జరిపిన తర్వాత వైద్య పరీక్షలు నిర్వహించి, నిందితుడిని కోర్టులో హాజరుపర్చనున్నారు. ఇప్పటికే 14 రోజుల జ్యుడిషియల్ రిమాండ్‌ ఉన్నందున మళ్లీ జైలుకు తరలించే అవకాశం ఉంది.