ట్రైనీ IPS వేధింపు కేసు: ఉదయకృష్ణారెడ్డి కస్టడీ, మరో మహిళతో సంబంధం వెలుగులోకి

మహిళా ట్రైనీ IPS వేధింపు కేసులో అరెస్టైన ఉదయకృష్ణారెడ్డిపై పోలీసులు దర్యాప్తు ముమ్మరం చేశారు. నిందితుడికి నెల్లూరు జిల్లాకు చెందిన ఓ వివాహితతో సన్నిహిత సంబంధం ఉన్నట్టు ఆధారాలు లభించాయి.

పోలీసులు కర్ణాటక మహిళా ట్రైనీ IPS భర్త నుంచి వర్చువల్‌గా వాంగ్మూలం సేకరించారు. ఆమె ఫోన్ లాక్కోవడం, గదిలోకి బలవంతంగా చొరబడటం వాస్తవమేనని ఆధారాలు సేకరించారు. కేసు దర్యాప్తులో భాగంగా అశోక్ నగర్‌లోని నిందితుడి గదిలో సోదాలు నిర్వహించగా, లాప్‌టాప్, సెల్ ఫోన్, రెండు ప్రేమలేఖలు, కత్తి స్వాధీనం చేసుకున్నారు.

ప్రేమలేఖలపై ఉన్న పేర్ల ఆధారంగా దర్యాప్తు చేసిన పోలీసులకు నెల్లూరు మహిళ వివరాలు తెలిశాయి. ఆమెకు 2014లో వివాహమై, భర్తతో మనస్పర్ధలతో 2023 నుంచి కుమారుడితో విడిగా ఉంటున్నారు. చట్టపరంగా విడాకులు తీసుకోలేదు. ఈ క్రమంలో ఉదయకృష్ణారెడ్డితో పరిచయం ఏర్పడి, లివిన్ రిలేషన్‌కు ఆయన ప్రతిపాదించగా ఆమె నిరాకరించినట్లు సమాచారం.

ఈ ఏడాది ఫిబ్రవరిలో ట్రైనీ IPS ఆమెను కలిసి, తనపై ఉదయకృష్ణారెడ్డి దాడి, విపరీత ప్రవర్తన గురించి బాధలు పంచుకున్నట్టు తెలిసింది. ఆ తర్వాత ఆ మహిళ నిందితుడికి దూరంగా ఉంటున్నారు. ఉదయకృష్ణారెడ్డి ప్రకాశం జిల్లా ఊళ్ళపాలెంకు చెందిన వ్యక్తి, సివిల్స్ ప్రిపరేషన్‌కు హైదరాబాద్ వచ్చారు. పోలీసులు సుమారు 20 మంది నుంచి వాంగ్మూలం సేకరించి, నిందితుడిని కస్టడీలోకి తీసుకొని మరిన్ని వివరాలు రాబడుతున్నారు.