ఉజ్జయిని మహంకాళి బోనాలకు 2500 పోలీసుల బందోబస్తు – తొలిసారి AI నిఘా

సికింద్రాబాద్‌లోని ఉజ్జయిని మహంకాళి అమ్మవారి బోనాల జాతరకు 2500 మంది పోలీసులతో బందోబస్తు ఏర్పాటు చేశారు. హైదరాబాద్ పోలీస్ కమిషనర్ ఈ విషయాన్ని వెల్లడించారు.

తొలిసారిగా భక్తుల భద్రత కోసం AI టెక్నాలజీని వాడుతున్నారు. పిక్ పాకెటర్లు, చైన్ స్నాచర్ల నుంచి రక్షణకు ప్రత్యేక నిఘా వ్యవస్థను రూపొందించారు. డీసీపీ రక్షిత నేతృత్వంలో భక్తులకు ఇబ్బంది కలగకుండా కంట్రోల్ రూమ్ ఏర్పాటు చేశారు.

జీహెచ్ఎంసీ, ఎండోమెంట్స్ శాఖల సమన్వయంతో బందోబస్తు చేపట్టారు. షీ టీమ్స్, క్రైమ్ టీమ్స్ విధులు నిర్వహిస్తున్నాయి. ఇప్పటికే గోల్కొండ, బల్కంపేట బోనాలు విజయవంతంగా పూర్తి కాగా, లాల్ దర్వాజా బోనాలకు కూడా ఇలాంటి ఏర్పాట్లు ఉంటాయని పోలీస్ కమిషనర్ తెలిపారు.

భక్తులు కూడా పోలీసులకు సహకరించాలని ఆయన కోరారు. రాష్ట్ర ప్రజలు సుఖ సంతోషాలతో సురక్షితంగా ఉండాలని ఆకాంక్షించారు. ఈ బోనాలు చారిత్రక పండగ అని, ప్రజల ఆదరణ బాగుందని చెప్పారు.