కేంద్ర మంత్రివర్గ ఆమోదం: ఢిల్లీలో ప్రపంచంలోనే అతిపెద్ద మ్యూజియం

కేంద్ర మంత్రివర్గం ఢిల్లీలోని నార్త్ బ్లాక్, సౌత్ బ్లాక్ భవనాల్లో 'యుగ యుగీన్ భారత్ మ్యూజియం' ఏర్పాటుకు ఆమోదం తెలిపింది. ఇది ప్రపంచంలోనే అతిపెద్ద మ్యూజియం కానుంది.

మ్యూజియం నిర్మాణానికి సుమారు ₹3,230 కోట్లు ఖర్చు అవుతుందని అంచనా వేస్తున్నారు. దాదాపు 78,000 చదరపు మీటర్ల విస్తీర్ణంలో దీన్ని అభివృద్ధి చేయనున్నారు. చారిత్రక భవనాల వారసత్వానికి ఎలాంటి నష్టం కలగకుండా ఆధునిక మ్యూజియంగా మారుస్తారు. భారతదేశ నాగరికత, సంస్కృతి, సంప్రదాయాల చరిత్రను ప్రపంచానికి చాటేలా దీన్ని తీర్చిదిద్దనున్నారు.

ప్రాజెక్టును 2026-27 నుంచి 2030-31 వరకు దశలవారీగా అమలు చేయనున్నారు. 2027 ద్వితీయార్థంలో తొలి గ్యాలరీని ప్రజలకు అందుబాటులోకి తీసుకురావడం లక్ష్యంగా పెట్టుకున్నారు. ప్రదర్శన కోసం ఇప్పటికే 18 లక్షల వస్తువులను గుర్తించారు. నేషనల్ మ్యూజియం, కేంద్ర సాంస్కృతిక శాఖ మ్యూజియంల నుంచి, ఏఎస్ఐకి చెందిన 52 ప్రదేశాల మ్యూజియంల నుంచి చారిత్రక వస్తువులను సేకరించారు.

అదే సమావేశంలో గ్రేటర్ నోయిడా మెట్రో ప్రయాణికులకు సంబంధించిన నిర్ణయానికి కూడా ఆమోదం లభించింది. నోయిడా సెక్టార్ 51 నుంచి గ్రేటర్ నోయిడా సెక్టార్ 4 వరకు ఆక్వా లైన్ మెట్రో కారిడార్‌ను 8.5 కిలోమీటర్లు పొడిగిస్తారు. ఈ మార్గంలో ఐదు కొత్త మెట్రో స్టేషన్లు నిర్మిస్తారు.