పలు రాష్ట్రాల్లో అకాల వర్షాలు, ఈదురుగాలులు; తెలుగు రాష్ట్రాల్లోనూ భారీ వర్షం

అకాల వర్షాలు, ఈదురుగాలులు ఒకేసారి పలు రాష్ట్రాలను తాకాయి. బెంగళూరుతో పాటు జమ్మూ కాశ్మీర్, తెలంగాణ, ఆంధ్రప్రదేశ్‌లోని కొన్ని ప్రాంతాల్లో భారీ వర్షం నమోదైంది.

బెంగళూరులో సాయంత్రం ఆకాశం మేఘావృతమై ఒక్కసారిగా వర్షం మొదలైంది. లోతట్టు ప్రాంతాల్లో నీరు నిలవడంతో ట్రాఫిక్‌కు తీవ్ర అంతరాయం కలిగింది. వాహనదారులు కిలోమీటర్ల మేర ఇబ్బందులు ఎదుర్కొన్నారు. రాబోయే రెండు రోజుల్లో నగరంలో భారీ వర్షాలు కురిసే అవకాశం ఉందని అధికారులు తెలిపారు. కర్ణాటకలోని 23 జిల్లాలకు వాతావరణ శాఖ హెచ్చరిక జారీ చేసింది.

జమ్మూ కాశ్మీర్‌లోని కిష్‌త్వార్ జిల్లాలో ఎగువ ప్రాంతాల్లో భారీ వర్షం కురవడంతో వాగులు ఉధృతంగా ప్రవహించాయి. కొండచరియలు విరిగిపడటంతో ఎన్హెచ్‌-244పై రాకపోకలు స్తంభించాయి. రోడ్డుపై మట్టి, రాళ్లు పేరుకుపోవడంతో ట్రాఫిక్‌ నిలిచిపోయింది.

తెలుగు రాష్ట్రాల్లోనూ వర్షం ప్రభావం కనిపించింది. భద్రాద్రి కొత్తగూడెం జిల్లాలో కనకగూడెం, పినపాక మండలాల్లో ఈదురుగాలులకు పెద్ద మామిడి చెట్టు కూకటివేళ్లతో సహా విరిగిపడింది. అక్కడ నిలిపిన రెండు ట్రాక్టర్లు ధ్వంసమయ్యాయి. పలు ఇళ్ల పైకప్పు రేకులు ఎగిరిపోయాయి. ఇళ్లలోకి వర్షపు నీరు చేరి సామగ్రి తడిసిపోయింది. విజయనగరం జిల్లాలో ఉరుములు, మెరుపులతో కూడిన భారీ వర్షం కురిసింది. ఈదురుగాలులు కూడా బీభత్సం సృష్టించాయి. పిడుగులు పడే అవకాశం ఉన్నందున ప్రజలు అప్రమత్తంగా ఉండాలని, చెట్లు, కరెంట్ స్తంభాలకు దూరంగా ఉండాలని అధికారులు సూచించారు.