హార్ముజ్ జలసంధిలో ట్యాంకర్లపై ఇరాన్ దాడి, అమెరికా తాజా వైమానిక దాడులతో కాల్పుల విరమణ ఒప్పందం రద్దు

హార్ముజ్ జలసంధిలో వాణిజ్య నౌకలపై ఇరాన్ మరోసారి దాడి చేసిన నేపథ్యంలో అమెరికా దళాలు ఇరాన్‌పై తాజా వైమానిక దాడులు జరిపాయి. ఈ దాడులతో ఇటీవల స్విట్జర్లాండ్‌లో కుదిరిన కాల్పుల విరమణ ఒప్పందం ఆచరణలో లేదని స్పష్టమైంది. US సెంట్రల్ కమాండ్ (CENTCOM) ప్రకటన ప్రకారం, ఇరాన్ డ్రోన్, ఎయిర్ డిఫెన్స్ స్థావరాలను లక్ష్యంగా చేసుకుని ఈ దాడులు నిర్వహించారు. గత 24 గంటల్లో అమెరికా నిర్వహించిన రెండో దాడి ఇదే. ఇరాన్ అనుబంధ దళాలు MV ఎవర్ లవ్లీ, MT కికు అనే రెండు ట్యాంకర్ నౌకలపై డ్రోన్ దాడులు చేశాయని CENTCOM తెలిపింది. పనామా జెండా కింద నడుస్తున్న MT కికు నౌకపై తూర్పు అమెరికా సమయం ఉదయం 4:30 గంటలకు ఇరాన్ వన్-వే డ్రోన్ దాడి చేసింది. ఈ నౌకలో 2 మిలియన్ బ్యారెల్స్ ముడి చమురు ఉంది. MV ఎవర్ లవ్లీపై దాడి తర్వాత ఇరాన్‌కు కాల్పుల విరమణ ఒప్పందాన్ని గౌరవించే అవకాశం ఇచ్చినా, ఇరాన్ దాన్ని నిరాకరించి మళ్లీ దాడి చేసిందని CENTCOM స్పష్టం చేసింది. US దళాలు పూర్తి అప్రమత్తంగా ఉన్నాయని, గల్ఫ్ ప్రాంతంలో వాణిజ్య నౌకల భద్రతకు కట్టుబడి ఉన్నామని పేర్కొంది. ఈ సంఘటనలతో US-ఇరాన్ మధ్య ఉద్రిక్తతలు మళ్లీ ఎస్కలేట్ అయ్యాయి. ఇరాన్ మాత్రం నౌకలు IRGC సూచించిన మార్గంలోనే ప్రయాణించాలని పట్టుబడుతుండగా, ఒమన్, ఇతర గల్ఫ్ దేశాలు US సహకారంతో ప్రత్యామ్నాయ మార్గాల్లో నౌకలను నడపడమే వివాదానికి కారణమని నిపుణులు చెబుతున్నారు. ప్రపంచ ముడి చమురు సరఫరాలో 20 శాతం హార్ముజ్ జలసంధి గుండా రవాణా అవుతుండటంతో, ఈ ఉద్రిక్తత అంతర్జాతీయ చమురు ధరలపై ప్రభావం చూపే అవకాశం ఉంది. భారత్‌కు కూడా ఈ జలసంధి కీలకం కావడంతో పరిణామాలపై నిఘా ఉంచాల్సిన అవసరం ఉంది.