US గోల్డెన్ డోమ్ తొలి పరీక్ష విజయవంతం: లేజర్ ఆయుధంతో బహుళ లక్ష్యాలను ఛేదించిన పెంటగాన్

వాషింగ్టన్: అమెరికా అధ్యక్షుడు డొనాల్డ్ ట్రంప్ ప్రతిష్టాత్మకంగా ప్రకటించిన గోల్డెన్ డోమ్ క్షిపణి రక్షణ వ్యవస్థ తొలి పరీక్షను విజయవంతంగా పూర్తి చేసింది. ట్రంప్ ప్రభుత్వం 1.2 ట్రిలియన్ డాలర్ల వ్యయంతో నిర్మిస్తున్న ఈ వ్యవస్థ బుధవారం తన మొదటి మైలురాయిని అధిగమించింది. అమెరికా రక్షణ శాఖ పెంటగాన్ ఈ విషయాన్ని అధికారికంగా వెల్లడించింది. డైరెక్టెడ్ ఎనర్జీ ఆయుధం లేజర్ కిరణాలను ఉపయోగించి అనేక వైమానిక లక్ష్యాలను గుర్తించి, ట్రాక్ చేసి ధ్వంసం చేసినట్లు రేథియాన్ కంపెనీ ప్రకటించింది. ఈ ఆయుధం లక్ష్యాలను లేజర్ కాంతితో దహించడం, కరిగించడం లేదా వాటి పనితీరును స్తంభింపజేయడం చేస్తుందని నిపుణులు వివరించారు. ఇది స్టార్ వార్స్ సినిమాల్లో కనిపించే సాంకేతికతను నిజ జీవితంలో అమలు చేసినట్లుగా ఉంది. గోల్డెన్ డోమ్‌ను మూడు పొరలుగా రూపొందిస్తున్నారు. మొదటి పొరలో పేట్రియాట్, THAAD వంటి భూ-స్థిత వ్యవస్థలు, రాడార్‌లు ఉంటాయి. రెండవ పొరలో సూపర్‌కంప్యూటర్లు, AI సిస్టమ్‌లు, సైబర్ సామర్థ్యాలు ఉంటాయి. మూడవ పొర అంతరిక్షంలో వేలాది లో-ఎర్త్ ఆర్బిటింగ్ ఉపగ్రహాల ద్వారా ఇంటర్సెప్టర్‌లను ప్రయోగించే వ్యవస్థ. 2030 నాటికి ఈ వ్యవస్థ పూర్తి స్థాయిలో అందుబాటులోకి రావాలని లక్ష్యంగా పెట్టుకున్నారు. ఖర్చు 1.2 ట్రిలియన్ డాలర్లకు చేరుకుంది. నిర్వహణ, లాజిస్టిక్స్‌తో కలిపి ఈ వ్యయం రెట్టింపు కావచ్చని అధ్యయనాలు హెచ్చరిస్తున్నాయి. ఈ వ్యవస్థ వల్ల అంతరిక్షంలో ఆయుధ పోటీ మొదలైంది. అమెరికా అంతరిక్షాన్ని ఆయుధీకరించడాన్ని చైనా తీవ్రంగా ఖండించింది. బీజింగ్ మాట్లాడుతూ ఔటర్ స్పేస్ ట్రీటీ ఉల్లంఘిస్తూ అంతరిక్షంలో పోరాట సామర్థ్యాలను పెంచడం ప్రమాదకరమని హెచ్చరించింది. రష్యా కూడా ఉపగ్రహ వ్యతిరేక ఆయుధాలను అభివృద్ధి చేస్తామని బెదిరించింది. ఈ పోటీ అంతరిక్షంలో తదుపరి ప్రపంచ సంఘర్షణకు నాంది కావచ్చని విశ్లేషకులు ఆందోళన వ్యక్తం చేస్తున్నారు. అమెరికా పన్ను చెల్లింపుదారులపై ఈ భారీ వ్యయం పడనుంది. ట్రంప్ కాంగ్రెస్‌ను ఈ ప్రాజెక్టుకు నిధులు కేటాయించాలని కోరారు.