ఇరాన్‌పై అమెరికా మూడోసారి దాడి; హార్ముజ్ మూసివేత ప్రకటించిన IRGC

అమెరికా ఇరాన్‌పై మరోసారి దాడులు చేసింది. ఈ వారంలో ఇది మూడోసారి. హార్ముజ్ జలసంధిలో ఓ వాణిజ్య నౌకపై ఇరాన్ క్షిపణి దాడి చేయడంతో అమెరికా ప్రతీకార చర్యలు చేపట్టింది. అమెరికా దాడులు బందర్ అబ్బాస్, ఖార్గ్ ద్వీపంలోని ఇరాన్ రివల్యూషనరీ గార్డ్ కార్ప్స్ (IRGC) స్థావరాలను లక్ష్యంగా చేసుకున్నాయి. స్విస్ జెండా కింద నడుస్తున్న GFS గెలాక్సీ అనే కంటైనర్ నౌకపై ఇరాన్ దాడి చేసింది. ఆ దాడిలో ఓ సిబ్బంది కనిపించకుండా పోగా, ఇంజిన్‌కు తీవ్ర నష్టం జరిగింది. కాల్పుల విరమణ ఒప్పందాన్ని ఇరాన్ గౌరవించలేదని, హార్ముజ్‌లో నౌకలను లక్ష్యంగా చేసుకునే ఇరాన్ సామర్థ్యాన్ని దెబ్బతీసేందుకే ఈ దాడులు చేసినట్లు అమెరికా తెలిపింది. ఇరాన్ దాడితో నౌకకు మంటలు అంటుకున్నాయి. అమెరికా అధ్యక్షుడు డొనాల్డ్ ట్రంప్ ఆదేశాలతో దాడులు జరిగాయని అమెరికా సైన్యం వెల్లడించింది. ఈ దాడుల నేపథ్యంలో IRGC హార్ముజ్ జలసంధిని మూసివేస్తున్నట్లు ప్రకటించింది. ఏ నౌక అయినా హార్ముజ్ దాటడానికి ప్రయత్నిస్తే నేరుగా దాడి చేస్తామని హెచ్చరించింది. ప్రస్తుతం చర్చలు జరుగుతున్నప్పటికీ కాల్పుల విరమణ లేదని ట్రంప్ స్పష్టం చేశారు. అమెరికా ఇరాన్ సైనిక సామర్థ్యాలను తగ్గించే ప్రయత్నాలు చేస్తోందని నిపుణులు భావిస్తున్నారు. ఈ వారం ఇప్పటికే రెండుసార్లు అమెరికా ఇరాన్‌పై దాడులు చేయగా, తాజా దాడులతో పశ్చిమాసియాలో ఉద్రిక్తతలు మరింత పెరిగాయి.