రష్యా చమురు కొనుగోలు దేశాలపై 100% సుంకం విధించే బిల్లుకు అమెరికా సెనెట్ ఆమోదం – భారత్, చైనాపై ప్రత్యక్ష ముప్పు

రష్యా, ఇరాన్‌లపై కఠిన ఆంక్షలు విధించే బిల్లుకు అమెరికా సెనెట్ ఆమోదం తెలిపింది. Lindsey Graham Sanctioning Russia and Iran Act 2026 పేరుతో వచ్చిన ఈ బిల్లు, రష్యా చమురు, గ్యాస్‌ను కొనుగోలు చేసే దేశాలపై 100% వరకు సుంకం విధించే అధికారాన్ని అధ్యక్షుడు డొనాల్డ్ ట్రంప్‌కు కల్పిస్తోంది. రష్యా ఎనర్జీ కొనుగోలు దేశాల్లో భారత్, చైనా అగ్రగామి దేశాలు కావడంతో, ఈ బిల్లు వీరిపై నేరుగా సుంకం ముప్పు తెస్తోంది.

ఈ బిల్లుకు సెనెట్‌లో 86-11 ఓట్ల తేడాతో భారీ మెజారిటీ లభించింది. దీనిపై అమెరికా ప్రతినిధుల సభ (House of Representatives) లో కూడా ఆమోదం అవసరం. బిల్లు చట్టం రూపంలో అమలైతే, రష్యా చమురు కొనుగోలులో టాప్-5 దేశాల నుంచి దిగుమతి చేసుకునే వస్తువులపై 100% సుంకం పడే అవకాశం ఉంది.

ప్రపంచ ఎనర్జీ సరఫరాలో 20% పైగా కీలకమైన స్ట్రెయిట్ ఆఫ్ హార్ముజ్ జలసంధి పూర్తి స్థాయిలో పనిచేయకపోవడం, సప్లై షాక్‌లతో భారత్ తన చమురు దిగుమతి మార్గాలను వైవిధ్యీకరించింది. ప్రస్తుతం 41 దేశాల నుంచి చమురు దిగుమతి చేసుకుంటోంది. వెనిజులా, నైజీరియా, రష్యా, అమెరికా, గల్ఫ్ దేశాలతో సహా పలు వనరుల నుంచి దిగుమతి విస్తరించింది.

అయితే, ఈ బిల్లు అమలు జరిగితే భారత ఎనర్జీ దిగుమతి ఖర్చులు పెరగవచ్చు. చైనాతో అమెరికా వాణిజ్యం 50,000 కోట్ల డాలర్ల స్థాయిలో ఉండటంతో, ఆ దేశంపై సుంకం విధించడం అమెరికా ఆర్థిక వ్యవస్థపై ప్రతికూల ప్రభావం చూపవచ్చు. బిల్లు అమెరికా ప్రతినిధుల సభలో చర్చించాల్సి ఉన్నందున, ట్రంప్ పాలన దీన్ని ఏ మేరకు అమలుచేస్తుందనేది కీలకంగా మారింది.