నిజామాబాద్ గంజ్‌లో టపాకాయల దుకాణాలు: భద్రతా నిబంధనల ఉల్లంఘన

నిజామాబాద్ నగరంలోని అత్యంత రద్దీ ప్రాంతమైన గంజ్ ఏరియాలో దీపావళి టపాకాయల విక్రయాలు జననివాసాల మధ్యే కొనసాగుతున్నాయి. ఈ ప్రాంతంలో వాణిజ్య సముదాయాలతో పాటు నివాస ప్రాంతాలు కూడా ఉన్నాయి. ఇక్కడ ప్రమాదం జరిగితే పెద్ద ఎత్తున ఆస్తి, ప్రాణ నష్టం జరిగే అవకాశం ఉంది.

దీపావళి నేపథ్యంలో పోలీసులు ముందస్తు ఆదేశాలు జారీ చేశారు. టపాకాయల విక్రయాలను నిర్దేశిత ఓపెన్ గ్రౌండ్లలోనే చేపట్టాలని సూచించారు. నగరంలోని పాలిటెక్నిక్ కళాశాల, మహిళా కళాశాల మైదానం, డిగ్రీ కళాశాల మైదానాలను ఈ విక్రయాలకు కేటాయించారు.

గ్రీన్ క్రాకర్స్‌కే అనుమతి ఉందని, ప్రమాదకర క్రాకర్స్ విక్రయించకూడదని పోలీసులు ఆదేశించారు. ఫైర్ సేఫ్టీకి సంబంధించి ఆన్‌లైన్‌లో దరఖాస్తు చేసుకుని అధికారుల అనుమతి పొందిన తర్వాతే విక్రయాలు చేయాలని స్పష్టం చేశారు. నిబంధనలు ఉల్లంఘించిన వారిపై కఠిన చర్యలు తీసుకుంటామని హెచ్చరించారు.

అయితే గంజ్ ఏరియాలో టపాకాయల దుకాణాలు ఇప్పటికీ జననివాసాల మధ్యే కనిపిస్తున్నాయి. ప్రధాన ప్రవేశ మార్గంలో అగ్నిమాపక వాహనం వెళ్లే వెసులుబాటు కూడా లేదు.

గంజ్ ఏరియాకు రోజూ వేలాది మంది వస్తుంటారు. పండుగ సామాన్లతో పాటు క్రాకర్స్ కొనుగోలు చేసేందుకు కూడా ప్రజలు ఆసక్తి చూపుతున్నారు. ఇరుకైన ప్రదేశంలో విక్రయాలు కొనసాగుతుండటంతో ప్రమాద అవకాశం ఉంది. ఇప్పటికైనా అధికారులు స్పందించి చర్యలు తీసుకోవాలని నగర ప్రజలు కోరుతున్నారు.