నగరిలో ఎంపీటీసీ రీకౌంటింగ్‌పై రోజా నిరసన.. పోలీసుల అరెస్టు

చిత్తూరు జిల్లా నగరిలోని విజయపురం మండలం ఇల్లత్తూరు ఎంపీటీసీ స్థానం లెక్కింపు కేంద్రం వద్ద మాజీ మంత్రి రోజా నిరసన చేపట్టారు. పోలీసులు ఆమెను అరెస్టు చేసి స్టేషన్‌కు తరలించారు.

తొలి లెక్కింపులో YSRCP అభ్యర్థి ఉదయగిరి దేవి 10 ఓట్ల మెజారిటీతో గెలిచారని YSRCP నేతలు చెప్తున్నారు. కానీ ఫలితాన్ని ప్రకటించకుండా అధికారులు నిలిపివేశారని వారు ఆరోపిస్తున్నారు. TDP అభ్యంతరం తర్వాత రీకౌంటింగ్ జరిపి TDP అభ్యర్థిని విజేతగా ప్రకటించారని వారు చెప్తున్నారు. రిటర్నింగ్ అధికారి ఏకపక్షంగా వ్యవహరించారని రోజా ఆరోపించారు.

ఎన్నికల అధికారుల వివరణ ప్రకారం, TDP అభ్యంతరం తర్వాత రెండుసార్లు లెక్కింపు జరిపారు. NOTA ఓట్లను తొలగించిన తర్వాత TDP అభ్యర్థి మూడు ఓట్ల తేడాతో గెలుపొందారు. ఫలితాన్ని ఇప్పటికే ప్రకటించినందున మూడోసారి రీకౌంటింగ్‌కు అవకాశం లేదని అధికారులు తెలిపారు.

నిరసనలో భాగంగా సుమారు 500 నుంచి 1000 మంది YSRCP నాయకులు, కార్యకర్తలు కౌంటింగ్ కేంద్రం వద్దకు చేరుకున్నారు. రోజా రోడ్డుపై కూర్చుని నిరసన వ్యక్తం చేశారు. ఆమెకు పోలీసులు, DSP తో వాగ్వాదం జరిగింది. లా అండ్ ఆర్డర్ సమస్య తలెత్తే అవకాశం ఉన్నందున పోలీసులు ఆమెను అరెస్టు చేసి తరలించారు. స్వల్పంగా లాఠీచార్జి చేసి కార్యకర్తలను చెదరగొట్టారు.

రీకౌంటింగ్ జరిపితే తప్ప కౌంటింగ్ కేంద్రం నుంచి వెళ్లనని రోజా చెప్పినట్టు సమాచారం. ఆమె అరెస్టు తర్వాత ఎంపీటీసీ అభ్యర్థి ఉదయగిరి దేవి, మరికొంతమంది కార్యకర్తలు రోడ్డుపై నిరసన కొనసాగిస్తున్నారు. ఈ విషయంపై హైకోర్టును ఆశ్రయిస్తామని YSRCP నేతలు తెలిపారు. ఈ ఘటనపై TDP స్పందన లభ్యం కాలేదు.