తాగునీటికే తొలి ప్రాధాన్యం ఇవ్వాలని మంత్రి ఉత్తమ్ కుమార్ రెడ్డి ఆదేశం

నీటి పారుదల శాఖ మంత్రి ఉత్తమ్ కుమార్ రెడ్డి తాగునీటికే తొలి ప్రాధాన్యం ఇవ్వాలని అధికారులను ఆదేశించారు. హైదరాబాద్ జలసౌధలో జరిగిన ఉన్నత స్థాయి సమీక్షలో ఆయన మాట్లాడారు.

రాష్ట్రంలోని జలాశయాల నీటి మట్టాలు, ప్రవాహాలు, మిగిలిన ఖరీఫ్ సీజన్కు సాగునీటి అవకాశాలపై ఈ సమీక్ష జరిగింది. ప్రతి నీటి చుక్కకు లెక్క ఉండాలని మంత్రి చెప్పారు. అందుబాటులో ఉన్న నీటితో ఖరీఫ్ పంటలను గరిష్టంగా కాపాడాలన్నారు.

ఆశలపై కాకుండా అందుబాటులో ఉన్న నీటి నిల్వలు, నమ్మదగిన ప్రవాహాలు, వర్షపాత అంచనాల ఆధారంగా సాగునీటి విడుదల నిర్ణయాలు తీసుకోవాలని ఆదేశించారు. ప్రవాహాలపై అనిశ్చితి ఉన్న జలాశయాల్లో నీటిని పొదుపుగా వినియోగించాలన్నారు.

ప్రత్యామ్నాయ వనరుల నుంచి నీరు తిరిగి నింపుకునే అవకాశం ఉన్న చోట్ల సాగునీటి విడుదలలో అనవసర జాప్యం చేయవద్దన్నారు. బైరా రిజర్వాయర్ పరిస్థితిని సమీక్షించారు. గోదావరి జలాలతో రిజర్వాయర్ నింపుకునే అవకాశం ఉన్నప్పుడు విడుదలలో జాప్యం ఎందుకు జరుగుతోందని ప్రశ్నించారు.