మేడిగడ్డ బ్యారేజీ నీటిని ఉపయోగించకుండానే రికార్డు స్థాయి వరి కొనుగోలు: మంత్రి ఉత్తమ్‌కుమార్‌రెడ్డి

తెలంగాణ రాష్ట్ర నీటిపారుదల శాఖ మంత్రి ఉత్తమ్‌కుమార్‌రెడ్డి కీలక వ్యాఖ్యలు చేశారు. గతంలోని బీఆర్ఎస్ ప్రభుత్వ హయాంలో కూలిపోయిన మేడిగడ్డ, అన్నారం, సుందిళ్ల బ్యారేజీల నుంచి కాంగ్రెస్ ప్రభుత్వం అధికారంలోకి వచ్చినప్పటి నుంచి ఒక్క చుక్క నీరు కూడా ఉపయోగించలేదని ఆయన పేర్కొన్నారు. అయినప్పటికీ, తెలంగాణలో భారతదేశంలోనే అత్యధికంగా రికార్డు స్థాయిలో వరి ధాన్యం కొనుగోలు చేసినట్లు మంత్రి వెల్లడించారు.

2023 అక్టోబరులో మేడిగడ్డ బ్యారేజీ కూలిన విషయాన్ని ఆయన గుర్తు చేశారు. నేషనల్ డ్యామ్ సేఫ్టీ అథారిటీ (NDSA) ప్రీలిమినరీ నివేదిక ప్రకారం, పేలవమైన డిజైన్, నిర్మాణ లోపాలు, నిర్వహణ వైఫల్యాల వల్లే ఈ ప్రమాదం జరిగిందని మంత్రి వివరించారు. మేడిగడ్డ, అన్నారం, సుందిళ్ల బ్యారేజీల్లో వాడిన సీకెంట్ పైల్ ఫౌండేషన్ లోపభూయిష్టంగా ఉందని, నీటిని నిల్వ చేయడానికి వీలు లేదని ఇంజనీర్ల నివేదిక చెప్పిందన్నారు.

కాళేశ్వరం ప్రాజెక్టును పూర్తి చేయడానికి అసలు రూ. 38 వేల కోట్లు కాగా, లక్షన్నర కోట్లకు పెరిగాయని ఆయన ఆరోపించారు. మరమ్మతులకు సుమారు రూ. 1.27 లక్షల కోట్లు అవసరమని సెంట్రల్ వాటర్ కమిషన్ (CWC) అంచనా వేసిందని చెప్పారు. అంతేకాక, CWC అనుమతి రాకముందే 2016లోనే కాంట్రాక్టర్లతో ఒప్పందాలు చేసుకున్నారని విమర్శించారు.

ప్రాణహిత–చేవెళ్ల ప్రాజెక్టులో నీటిని 483 మీటర్ల ఎత్తుకు ఎత్తగా, దానికి 3466 మెగావాట్ల విద్యుత్ అవసరం. కాళేశ్వరం ప్రాజెక్టులో ఇది 530 మీటర్లు, 8450 మెగావాట్లు అని మంత్రి పోల్చి చెప్పారు. గత ప్రభుత్వ నిర్ణయాల వల్ల తెలంగాణ రైతులకు నష్టం జరిగిందని ఆరోపించారు.