వడరేవు-పిడుగురాళ్ల ఫోర్‌లేన్ హైవే తొలి ప్యాకేజీ పూర్తి; టూరిజం, కనెక్టివిటీకి ఊతం

వడరేవు-పిడుగురాళ్ల జాతీయ రహదారి (NH-167A) నాలుగు వరుసల విస్తరణలో తొలి ప్యాకేజీ పూర్తయింది. వడరేవు నుంచి చిలకలూరిపేట వరకు సాగే ఈ రహదారి ఇప్పుడు వాహనాల రాకపోకలకు తెరుచుకుంది.

మొత్తం 85 కిలోమీటర్ల మార్గాన్ని విస్తరించే ఈ ప్రాజెక్టుకు 2022లో కేంద్రం రూ.1,851 కోట్లు మంజూరు చేసింది. వడరేవు-చిలకలూరిపేట (ప్యాకేజీ-1), చిలకలూరిపేట-నకరికల్లు (ప్యాకేజీ-2)గా విభజించారు. 2024 ఫిబ్రవరిలో మొదలైన ప్యాకేజీ-1 పనులు దాదాపు పూర్తికావడంతో ప్రస్తుతం వాహనాలు తిరుగుతున్నాయి.

ఈ మార్గం తెరుచుకోవడంతో బాపట్ల జిల్లా సముద్రతీర ప్రాంతాలకు టూరిజం భారీగా పెరిగింది. ప్రతి వారాంతం వేలాది వాహనాలు హైదరాబాద్ నుంచి ఇక్కడి బీచ్‌లకు వస్తున్నాయి. సూర్యలంక, చీరాల తీరాల్లో రిసార్ట్లు, వాటర్ గేమ్స్ వంటి ప్రాజెక్టులు వేగంగా విస్తరిస్తున్నాయి. స్థానికులకు ఉపాధి, భూముల ధరలు గణనీయంగా పెరిగాయి.

భూసేకరణ సమస్యలతో ఆలస్యమైన ప్యాకేజీ-2 పనులు ఇటీవల ప్రారంభమయ్యాయి. నర్సరావుపేట-నకరికల్లు మధ్య మట్టి పరీక్షలు పూర్తిచేసి నిర్మాణం వేగవంతం చేశారు.

రహదారి పూర్తి కావడంతో చెన్నై నుంచి తెలంగాణకు వెళ్లే భారీ వాహనాలకు ఇది దగ్గరదారి అవుతుంది. ప్రయాణ సమయం, ఇంధనం ఆదా అవుతాయి. ఆక్వా ఉత్పత్తుల ఎగుమతి-దిగుమతులకు కూడా సౌలభ్యం కలుగుతుంది.