పార్కుపై ఆరోపణలు నిరూపిస్తే ఎమ్మెల్యే పదవికి రాజీనామా: వంశీకృష్ణ

విశాఖపట్నం: విశాఖ దక్షిణ నియోజకవర్గ ఎమ్మెల్యే, జనసేన నేత వంశీకృష్ణ శ్రీనివాస్ ఒక సవాల్ విసిరారు. పార్కుకు సంబంధించి తనపై వచ్చిన ఆరోపణలు నిరూపించినట్లయితే తన ఎమ్మెల్యే పదవికి రాజీనామా చేస్తానని ఆయన ప్రకటించారు.

సీతంపేటలోని తన కార్యాలయంలో మీడియా సమావేశం నిర్వహించిన వంశీకృష్ణ, భోగాపురం విమానాశ్రయం ప్రారంభం కావడం సంతోషకరమని అన్నారు. మంత్రి నారాయణకు తాను ఇచ్చిన వినతి పత్రంపై కొన్ని మీడియా సంస్థలు వాస్తవాలు తెలుసుకోకుండా తప్పుడు కథనాలు ప్రసారం చేస్తున్నాయని ఆయన ఆరోపించారు.

తాను ప్రజా సమస్యల పరిష్కారంలో భాగంగానే స్పందిస్తున్నానని ఆయన స్పష్టం చేశారు. జిల్లా పార్టీ అధ్యక్షుడిగా ఎక్కడైనా పేదలకు అన్యాయం జరిగినప్పుడు స్పందించే హక్కు తనకు ఉందని చెప్పారు.

ఆధారాలు లేకుండా తనపై ఆరోపణలు చేస్తే చట్టపరమైన చర్యలు తీసుకుంటామని హెచ్చరించారు. ఎవరిపైనైనా వార్త రాసేటప్పుడు ఆ వ్యక్తి వాదన కూడా తీసుకోవాలని మీడియాకు సూచించారు.