రాజమౌళి కసి, ప్యాషన్‌పై పృథ్వీరాజ్ ప్రశంస: ఉదయం 5:15కే సెట్‌కు

దర్శకుడు ఎస్.ఎస్. రాజమౌళి, నటుడు మహేష్ బాబు కాంబినేషన్‌లో వస్తున్న 'వారణాసి' సినిమా షూటింగ్ జరుగుతోంది. ఈ చిత్రంలో మలయాళ నటుడు పృథ్వీరాజ్ సుకుమారన్ ప్రతినాయకుడిగా నటిస్తున్నారు. తాజాగా రాజమౌళి సెట్‌లో ఆయన పడుతున్న కష్టం గురించి పృథ్వీరాజ్ కొన్ని ఆసక్తికర వివరాలు వెల్లడించారు.

రాజమౌళి లాంటి దర్శకుడితో పని చేయడం తనకు దక్కిన గొప్ప అవకాశం అని పృథ్వీరాజ్ అన్నారు. సెట్‌లో ఆయన ఉత్సాహం చూస్తే, 20-30 ఏళ్లు ఎదురుచూసి తొలి సినిమా తీసే కొత్త దర్శకుడిలా కనిపిస్తారని చెప్పారు. రాజమౌళిలో ఉన్న కసి, ప్యాషనే ఆయన్ను ఈ స్థాయికి తీసుకొచ్చాయని అభిప్రాయపడ్డారు.

రాజమౌళి పనితీరు వివరిస్తూ, ఉదయం 7 గంటలకు ఫస్ట్ షాట్ ఉంటే ఆయన 5:15కే సెట్‌కు వచ్చేస్తారని పృథ్వీరాజ్ తెలిపారు. నటీనటులు వచ్చేసరికి కెమెరా, లైటింగ్ సిద్ధం చేసి, 12 సార్లు రిహార్సల్స్ కూడా పూర్తి చేస్తారట. సెట్‌లో భోజన విరామం కేవలం 20 నిమిషాలు మాత్రమేనని, అందరికంటే ముందే వచ్చి అందరూ వెళ్లాకే వెళ్తారని గుర్తు చేసుకున్నారు.

మహేష్ బాబు గ్లోబ్‌ట్రోటర్ పాత్రలో నటిస్తున్న ఈ సినిమా 2027 ఏప్రిల్ 7న విడుదల కానుందని చిత్రయూనిట్ ప్రకటించింది.