నాగార్జునసాగర్‌లో వరుణ యాగం ప్రారంభం; సీఎం రేవంత్ రెడ్డి పాల్గొననున్నారు

తెలంగాణ ప్రభుత్వం ఏర్పాటు చేసిన మహా వరుణ యాగం నాగార్జున సాగర్ లో ప్రారంభమైంది. మంత్రి ఉత్తం కుమార్ రెడ్డి, ఆయన సతీమణి శనివారం ఉదయం 4 గంటలకు ఈ యాగాన్ని ప్రారంభించారు. రాష్ట్రంలో వర్షాభావ పరిస్థితుల నేపథ్యంలో చెరువులు, జలాశయాలు నిండాలని ప్రార్థిస్తూ ఈ కార్యక్రమం నిర్వహిస్తున్నారు.

ఈ యాగం యాదగిరిగుట్ట దేవస్థానం పర్యవేక్షణలో జరుగుతోంది. 108 మంది ఋత్వికులు 11 హోమకుండాలతో వేద మంత్రోచ్చరణల మధ్య శాస్త్రీయంగా యాగం కొనసాగిస్తున్నారు. మధ్యాహ్నం 2:30కి ముఖ్యమంత్రి రేవంత్ రెడ్డి, ఆయన భార్య విజయ విహార్ ప్రాంగణానికి చేరుకుని, సాయంత్రం 3:24 నిమిషాలకు జరిగే మహా పూర్ణాహుతి కార్యక్రమంలో పాల్గొంటారు. ఇతర మంత్రులు కూడా కుటుంబంతో సహా పూర్ణాహుతిలో పాల్గొననున్నారు.

నాగార్జున సాగర్ లోని విజయ విహార్ ఆవరణలో ఈ యాగం నిర్వహిస్తున్నారు. మంత్రి ఉత్తం కుమార్ రెడ్డి మాట్లాడుతూ, తెలంగాణ, ఆంధ్రప్రదేశ్, మహారాష్ట్ర, కర్ణాటకల్లోని కృష్ణా, గోదావరి నదీ పరీవాహక ప్రాంతాల్లో మంచి వర్షాలు కురవాలని, జలాశయాలు నిండాలని ప్రార్థిస్తున్నామని తెలిపారు.