వేములవాడ రాజన్న ఆలయ అభివృద్ధి పనులు 55% పూర్తి: రూ.99 కోట్లు అదనంగా విడుదల

వేములవాడ శ్రీ రాజరాజేశ్వర స్వామి ఆలయ అభివృద్ధి పనులను రాష్ట్ర ప్రభుత్వ విప్ ఆది శ్రీనివాస్ శనివారం పరిశీలించారు. అధికారులతో కలిసి ఆయన తూర్పు గోపురం నిర్మాణం, అన్విటి మండపం విస్తరణ తదితర పనుల పురోగతిని సమీక్షించారు.

ఆ సందర్భంగా ఆది శ్రీనివాస్ మాట్లాడుతూ.. తెలంగాణ ముఖ్యమంత్రి రేవంత్ రెడ్డి ఆదేశాలు, దేవాదాయ శాఖ మంత్రి కొండా సురేఖ ప్రతిపాదనలు, జిల్లా మంత్రుల సహకారంతో పనులు వేగంగా సాగుతున్నాయని తెలిపారు. ఇప్పటికే మంజూరైన రూ.150 కోట్లకు అదనంగా ఇటీవల రూ.99 కోట్ల నిధులు విడుదల కావడంతో పనులను మరింత వేగవంతం చేస్తున్నామన్నారు.

ప్రస్తుతం ఆలయ అభివృద్ధి పనుల్లో 55% వరకు పూర్తయ్యాయని అధికారులు వివరించారు. తూర్పు గోపురాన్ని 95 అడుగుల ఎత్తుతో నిర్మిస్తున్నామని, ఇందుకు 80,000 క్యూబిక్ ఫీట్ల కృష్ణశిల అవసరమని తెలిపారు. ఇప్పటివరకు 14వ అంతస్తు వరకు రాయి తెప్పించామని, మిగిలిన శిలలను త్వరితగతిన తెప్పించి పనులు పూర్తి చేయాలని అధికారులను ఆదేశించినట్లు వెల్లడించారు.

ఆలయానికి వచ్చే భక్తులకు త్వరిత దర్శనం కల్పించేలా అన్ని చర్యలు తీసుకుంటున్నామని ఆది శ్రీనివాస్ తెలిపారు. అన్విటి మండపం విస్తరణను ప్రణాళిక ప్రకారం కొనసాగిస్తున్నామన్నారు.