వెనిజులాలో భారీ భూకంపాలు: 10,000 మంది మృత్యువాత పడి ఉండొచ్చని USGS అంచనా

వెనిజులాలో వరుసగా రెండు భారీ భూకంపాలు సంభవించాయి. యూఎస్ జియోలాజికల్ సర్వే (USGS) ప్రాథమిక అంచనాల ప్రకారం 10,000 మందికి పైగా మరణించి ఉండొచ్చు. శిథిలాల కింద వేలాది మంది చిక్కుకుపోయి ఉండవచ్చని కూడా USGS తెలిపింది.

మొదటి భూకంపం రిక్టర్ స్కేలుపై 7.2 తీవ్రతతో, 40 సెకన్ల వ్యవధిలో రెండో భూకంపం 7.5 తీవ్రతతో సంభవించాయి. రాజధాని కారాకస్, మెంటాల్బాన్, మోరాన్ నగరాల్లో భవనాలు కూలినట్లు సమాచారం. జాతీయ సెలవు దినం కావడంతో ప్రజలు ఇళ్లలో ఉండటంతో ప్రాణనష్టం పెద్ద ఎత్తున జరిగిందని అంచనా.

కారాకస్‌లోని సైమన్ బొలీవర్ అంతర్జాతీయ విమానాశ్రయం దెబ్బతినడంతో విమాన సేవలు నిలిపివేశారు. అనేక నగరాల్లో విద్యుత్, కమ్యూనికేషన్ నెట్వర్కులు దెబ్బతిన్నాయి. దీంతో సహాయక చర్యలకు అంతరాయం ఏర్పడింది.

వెనిజులా తాత్కాలిక అధ్యక్షుడు డెల్సీ రోడ్రిజ్ దేశంలో అత్యవసర స్థితి ప్రకటించారు. సైన్యాన్ని రంగంలోకి దించి సహాయక చర్యలు చేపట్టారు. ఆసుపత్రుల్లో క్షతగాత్రుల సంఖ్య పెరుగుతోంది. వైద్య సిబ్బంది ప్రాణ రక్షణకు శ్రమిస్తున్నారు.

ప్రకంపనలు పొరుగు దేశాలైన కొలంబియా, బ్రెజిల్ లోని అమెజాన్ ప్రాంతంలో కూడా అనుభవమయ్యాయి. కరేబియన్ దీవులైన అరూబా, బొనైర్, కొరాసావో ప్రాంతాల్లో కూడా ప్రకంపనలు రావడంతో సముద్రతీర ప్రాంతాల్లో హై అలర్ట్ ప్రకటించారు. మొదట సునామి హెచ్చరికలు జారీ చేసినా, ఆ తర్వాత ఉపసంహరించుకున్నారు.

అమెరికా ప్రభుత్వం రెస్క్యూ బృందాలను, వైద్య సామగ్రిని పంపనుంది. ఐక్యరాజ్య సమితి సహా పలు దేశాలు సంఘీభావం ప్రకటించాయి. అధికారికంగా మరణాల సంఖ్యను ప్రభుత్వం ఇంకా ప్రకటించలేదు.