వెనిజులాలో భారీ భూకంపాలు: రిక్టర్ స్కేల్పై 7.1, 7.5 తీవ్రతతో రెండు భూకంపాలు కరాకస్ను కుదిపేశాయి

వెనిజులాలో తాజాగా ఒకదాని తర్వాత మరొకటి వచ్చిన రెండు శక్తివంతమైన భూకంపాలు దేశాన్ని కుదిపేశాయి. రాజధాని కరాకస్ సహా అనేక నగరాలు తీవ్ర ప్రభావానికి గురయ్యాయి. భూకంపాల తీవ్రత రిక్టర్ స్కేల్పై వరుసగా 7.1, 7.5 గా నమోదైంది. ఈ సంఘటనతో పలు భవనాలు కుప్పకూలాయి, వీధుల్లో ప్రజలు భయంతో పరుగులు తీశారు.

భూకంపం రాగానే కరాకస్ లోని అనేక భవనాలు కూలిపోయాయి. విమానాశ్రయంలోని లాంజ్, వేచి ఉండే ప్రదేశం తీవ్రంగా దెబ్బతిన్నాయి. వీడియోలలో ప్రజలు ఏడుస్తూ, భవనాల నుంచి బయటకు పరిగెత్తడం స్పష్టంగా కనిపించింది. ఒక భవనం క్షణాల్లో శిథిలమవడం కెమెరాలో రికార్డయింది. పోలీసులు, అత్యవసర సేవల సిబ్బంది శిథిలాలను తొలగిస్తూ చిక్కుకున్న వారిని రక్షించేందుకు ప్రయత్నిస్తున్నారు.

యూఎస్ జియలాజికల్ సర్వే (USGS) భూకంప తీవ్రతను నమోదు చేసింది. కరాకస్ కు పశ్చిమాన 168 కిలోమీటర్ల దూరంలో, కరీబియన్ తీరం వెంబడి ఉన్న ఒక కమ్యూనిటీ కేంద్రంగా భూకంప కేంద్రం గుర్తించబడింది. మంత్రి అల్ కబలో మాట్లాడుతూ ఈ ప్రకంపనలు పలు రాష్ట్రాల్లో అనుభూతి చెందాయని తెలిపారు. తాత్కాలిక అధ్యక్షుడు రొడ్రి సామాజిక మాధ్యమాల్లో త్వరలో జాతినుద్దేశించి ప్రసంగిస్తారని పోస్ట్ చేశారు.

ఈ భూకంపాల మధ్య సునామీ ముప్పు ఏర్పడిందని ప్రాథమికంగా భావించినప్పటికీ, పసిఫిక్ సునామీ వార్నింగ్ సెంటర్ (PTWC) తుది నివేదికలో వెనిజులా, కరీబియన్ తీరాలకు సునామీ ప్రమాదం లేదని స్పష్టం చేసింది. దీంతో సునామీ భయాలు తొలగిపోయాయి. ప్రస్తుతం భవనాల శిథిలాలను తొలగిస్తూ, గల్లంతైన వారి కోసం సహాయక చర్యలు యుద్ధ ప్రాతిపదికన కొనసాగుతున్నాయి. ఇప్పటికీ ఎంత మంది శిథిలాల కింద చిక్కుకున్నారో ఖచ్చితమైన సమాచారం లేదు.

వెనిజులా ఉత్తర తీరప్రాంతం భూకంప ప్రమాదం ఎక్కువుగా ఉన్న జోన్లో ఉంది. దేశ జనాభాలో సుమారు 80% మంది ఈ ప్రమాదకర ప్రాంతాల్లోనే నివసిస్తున్నారు. గతంలో కూడా ఇక్కడ పెద్ద భూకంపాలు సంభవించాయి. భూకంపం అనంతరం ఆఫ్టర్‌షాక్‌లు వచ్చే అవకాశం ఉండడంతో, ప్రజలను అప్రమత్తంగా ఉండాలని అధికారులు హెచ్చరించారు. సహాయక చర్యలు పూర్తయ్యాకే ప్రాణనష్టం, గాయపడిన వారి లెక్కలు బయటికి వస్తాయని ప్రభుత్వం తెలిపింది.