అమరావతిలో శ్రీ వేంకటేశ్వర స్వామి ఆలయ నిర్మాణం శరవేగంగా

అమరావతి రాజధాని ప్రాంతంలోని వెంకటపాళెంలో తిరుమల తరహాలో శ్రీ వేంకటేశ్వర స్వామి ఆలయం నిర్మిస్తున్నారు. ఈ ప్రాజెక్టుకు రూ. 140 కోట్లు వ్యయం అవుతోంది. ప్రధాన ఆకర్షణగా 120 అడుగుల ఎత్తుతో ఏడంతస్తుల మహారాజగోపురం తూర్పు దిశలో నిర్మిస్తున్నారు. ఉత్తర, దక్షిణ, పడమర దిశలలో ఐదంతస్తుల రాజగోపురాలు కూడా కట్టనున్నారు.

ఆలయంతో పాటు అద్దాల మండపం, కళ్యాణోత్సవ మండపం, ఆర్జిత సేవ మండపాలు ఏర్పాటు చేస్తున్నారు. స్వామి వారి బ్రహ్మోత్సవాలు, రథోత్సవాల కోసం ఏడు కోట్ల రూపాయలతో 40 అడుగుల వెడల్పైన మాడ వీధులు అభివృద్ధి చేస్తున్నారు. టిటిడి 30 టన్నుల భారీ కొయ్య రథాన్ని తయారు చేసే ప్రతిపాదనను పరిశీలిస్తోంది.

నిర్మాణానికి కృష్ణ శిలలను, మహారాజగోపురాల కోసం తమిళనాడు నామక్కల్ నుంచి ప్రత్యేక రాయిని, ప్రాకారాలకు పల్నాడు జిల్లా కమ్మవారి పాలెం సెలలను వినియోగిస్తున్నారు. ప్రస్తుతం మూడు ప్యాకేజీల్లో 15% పనులు పూర్తయ్యాయి. తదుపరి దశలో రూ. 150 కోట్లతో లడ్డు విక్రయ కేంద్రం, అన్నప్రసాద భవనం, విశ్రాంతి గదులు, టిటిడి కార్యాలయం, ఆడిటోరియం వంటి సౌకర్యాలు కల్పించనున్నారు.