ఇకపై కేమియో పాత్రలు చేయనని విజయ్ సేతుపతి ప్రకటన; 'జైలర్ 2'కు మాత్రమే మినహాయింపు

నటుడు విజయ్ సేతుపతి ఇకపై ఏ సినిమాలోనూ కేమియో పాత్రలు చేయబోనని ప్రకటించారు.

కోలీవుడ్, టాలీవుడ్‌లలో విభిన్నమైన పాత్రలతో గుర్తింపు పొందిన విజయ్ సేతుపతి, ఇంతకుముందు చిన్న పాత్ర అయినా కథ లేదా స్నేహం కోసం అంగీకరించేవారు. అయితే, తాజాగా ఆయన నో కేమియో విధానాన్ని ప్రకటించారు.

అయితే, రజనీకాంత్ నటిస్తున్న 'జైలర్ 2' చిత్రంలో మాత్రం ఒక ప్రత్యేక పాత్రలో కనిపించేందుకు అంగీకరించారు. రజనీకాంత్ పట్ల అపారమైన గౌరవం వల్లే ఈ ప్రాజెక్ట్‌కు సమ్మతి తెలిపినట్లు విజయ్ సేతుపతి వివరించారు. జైలర్ 2 పోస్టర్‌లో తన ఫోటో ఉన్నా ప్రేక్షకులు రజనీకాంత్ వైపే దృష్టి పెడతారని, కాబట్టి తనకు ఎలాంటి ఇబ్బంది ఉండదని ఆయన తెలిపారు.

కేమియో పాత్రలు మానేయడానికి గల ప్రధాన కారణాన్ని కూడా విజయ్ సేతుపతి బహిరంగంగా చెప్పారు. చిన్న బడ్జెట్ సినిమాల్లో తాను కొద్ది నిమిషాలే కనిపించినా, నిర్మాతలు పోస్టర్లపై తన ఫోటోను పెద్దదిగా చూపించి మార్కెటింగ్ చేస్తున్నారని ఆరోపించారు. దీని వల్ల ప్రేక్షకులు మోసపోవడంతో పాటు, సోలో హీరోగా తాను చేస్తున్న సినిమాల మార్కెట్, క్రేజ్ ప్రభావితమవుతున్నాయని ఆయన తెలిపారు. ఈ పరిస్థితి నుంచి బయటపడేందుకే ఈ కఠిన నిర్ణయం తీసుకున్నట్లు వివరించారు.