విజయవాడలో దీపావళి క్రాకర్ అమ్మకాలు జోరు — ఫైర్ సేఫ్టీ నిబంధనలు తప్పనిసరి

విజయవాడలో దీపావళి బాణసంచా అమ్మకాలు జోరుగా కొనసాగుతున్నాయి. పండుగ సీజన్ నేపథ్యంలో నగరంలోని వివిధ ప్రాంతాల్లో క్రాకర్స్ షాపులు ఏర్పాటు చేశారు. ఈ షాపులపై అగ్నిమాపక శాఖ ప్రత్యేక దృష్టి సారించింది. భద్రతా నిబంధనలు పాటించాలని వ్యాపారులకు అధికారులు సూచించారు.

షాపుల ఏర్పాటులో కొన్ని నిబంధనలు తప్పనిసరి చేశారు. రెండు షాపుల మధ్య కనీసం మూడు అడుగుల దూరం ఉండాలి. షెడ్‌లను జింక్ షీట్ లేదా ఐరన్ షీట్‌తో నిర్మించాలి. లైటింగ్‌లో లూజ్ వైరింగ్ ఉండకూడదు, కండ్యూట్ వాడాలి. షాపులు ఒకదానికొకటి ఎదురుగా ఉండకూడదు. L లేదా U ఆకారంలో ఏర్పాటు చేసి, మధ్యలో 15 మీటర్ల గ్యాప్ ఉంచాలి.

ఈ నిబంధనలను ఇటీవల శివకాశీలో అధికారులు పరిశీలించారు. అక్కడ పాటిస్తున్న భద్రతా చర్యలను ఆంధ్రప్రదేశ్‌లోనూ అమలు చేస్తున్నట్లు అగ్నిమాపక శాఖ డైరెక్టర్ జనరల్ వెంకటరమణ తెలిపారు.

స్టాక్ విషయంలోనూ ఆదేశాలు ఇచ్చారు. అవసరానికి మించి స్టాక్ నిల్వ ఉంచకూడదు. అవసరమైనప్పుడు రీఫిల్ చేసుకోవాలి. ఈ ఉదయం నుంచి ఈ ప్రత్యేక డ్రైవ్ కొనసాగుతోంది. ప్రతి షాపుకు అధికారులు వెళ్లి అక్కడి పరికరాలను పరిశీలిస్తున్నారు.

వ్యాపారులతో ప్రత్యేక మీటింగ్ నిర్వహించారు. ప్యాక్డ్ మెటీరియల్ మాత్రమే అమ్మాలని సూచించారు. లూజ్ మెటీరియల్, లోకల్‌గా తయారు చేసిన వస్తువులు అమ్మకూడదని చెప్పారు. కొనుగోలుదారులకు తగిన జాగ్రత్తలు వివరించాలని కూడా ఆదేశించారు.

ప్రజలకు కరపత్రాలు, సోషల్ మీడియా ద్వారా అవగాహన కల్పిస్తున్నారు. ఒక్క అగ్నిప్రమాదం కూడా జరగకూడదని అగ్నిమాపక శాఖ లక్ష్యంగా పెట్టుకుంది. నిబంధనలు ఉల్లంఘించిన షాపులపై కఠిన చర్యలు తీసుకుంటామని అధికారులు హెచ్చరించారు.