కరీంనగర్‌లో దీపావళి పటాసుల మార్కెట్ కళకళలాడుతోంది

కరీంనగర్‌లో దీపావళి పటాసుల మార్కెట్ కళకళలాడుతోంది. నగరంలో రెండు చోట్ల పటాసుల అమ్మకం కేంద్రాలు ఏర్పాటు చేశారు. ఒకటి అంబేద్కర్ స్టేడియంలో, మరోటి మార్కెట్ గ్రౌండ్‌లో ఉంది.

మార్కెట్ గ్రౌండ్‌లో ఈసారి 120 దుకాణాలకు అనుమతి ఇచ్చారు. చిచ్చుబుడ్లు, భూచక్రాలు, బాంబులు, రాకెట్లతో పాటు రకరకాల ఫ్యాన్సీ క్రాకర్స్ కూడా అందుబాటులో ఉన్నాయి. పిల్లలు తల్లిదండ్రులతో కలిసి కొనుగోలుకు వస్తున్నారు.

ఈసారి ధరలు పెరిగాయని కొందరు తల్లిదండ్రులు చెప్తున్నారు. గత సంవత్సరం దీపావళికి సుమారు ₹2,000 ఖర్చు అయితే, ఈసారి ₹3,000 అయిందని ఒక కుటుంబం తెలిపింది. మళ్లీ రెండో విడత కొనుగోలుకు కూడా వచ్చామని వారు చెప్పారు. పిల్లల సంతోషం కోసం ఖర్చు చేస్తున్నామని అన్నారు. మరో కుటుంబం తమ బిడ్డ కోసం ₹1,000 పటాసులు కొన్నట్లు తెలిపింది.

విక్రయ ధరలు పెరిగినా కస్టమర్లకు గత సంవత్సరం రేటులోనే ఇస్తున్నామని దుకాణదారులు చెప్పారు. గతంలో లక్ష్మీ బాంబులు, పిట్ట బాంబుల స్థానంలో ఇప్పుడు రంగులు వెదజల్లే ఫ్యాన్సీ క్రాకర్స్ ఎక్కువగా వస్తున్నాయని వారు తెలిపారు.

పటాసులు కాల్చేటప్పుడు దూరం నుంచి కాల్చాలని, కళ్లకు రక్షణ పెట్టుకోవాలని తల్లిదండ్రులు పిల్లలకు చెప్తున్నారు. పెద్ద శబ్దం వచ్చే బాంబులు, కాలుష్యం కలిగించే పటాసులు కొనవద్దని కొందరు తెలిపారు. సాయంత్రం లక్ష్మీదేవి పూజ చేసిన తర్వాత పటాసులు కాల్చడం ఆనవాయితీ అని వారు చెప్పారు.