నిజామాబాద్‌లో దీపావళి బాణసంచా దుకాణాల్లో కొనుగోళ్ల జోరు

నిజామాబాద్ పాలిటెక్నిక్ కళాశాల మైదానంలో ఏర్పాటు చేసిన బాణసంచా దుకాణాల్లో కొనుగోళ్లు జోరుగా సాగుతున్నాయి. దీపావళి సమీపించడంతో మూడు రోజుల నుంచి షాపుల వద్ద కొనుగోలుదారుల రద్దీ కనిపిస్తోంది.

కుటుంబ సభ్యులంతా కలిసి వచ్చి పటాకులు కొంటున్నారు. చిచ్చుబుడ్లు, కాకరొత్తులు, భూచక్రాలు, రాకెట్లు, ఫ్యాన్సీ టపాసులు వంటి రకరకాల బాణసంచాను కొనుగోలు చేస్తున్నారు. పిల్లలకు నచ్చిన పటాకులు కొనిచ్చేందుకు తల్లిదండ్రులు ఆసక్తి చూపుతున్నారు.

ఈ సంవత్సరం బాణసంచా ధరలు 17 నుంచి 18 శాతం పెరిగాయని వ్యాపారులు తెలిపారు. మార్జిన్ తగ్గించుకుని గత సంవత్సరంతో పోలిస్తే కేవలం ₹49 మాత్రమే ధర పెంచి అమ్ముతున్నామని ఒక వ్యాపారి చెప్పారు. ధరల పెరుగుదల, ఎల్ నినో ప్రభావంతో ఏర్పడిన కరువు పరిస్థితుల కారణంగా గత సంవత్సరంతో పోలిస్తే కొనుగోళ్లు తగ్గాయని వ్యాపారులు అంటున్నారు.

దుకాణాల్లో కేజీ సేల్ కొనసాగుతోంది. ఏ వస్తువు తీసుకున్నా కిలో ₹799 చొప్పున అమ్ముతున్నారు. ₹800ల గిఫ్ట్ ప్యాక్‌లో కొత్త రకం షాట్స్, హ్యాండ్ గన్స్, సైరన్స్, లోటస్, బటర్‌ఫ్లైస్, పీకాక్ డిజైన్ రాకెట్లు, పారాషూట్స్ ఉన్నాయి. అన్ని ఐటమ్స్‌కు బార్కోడ్ పెట్టామని, 5 శాతం నుంచి 10 శాతం వరకు డిస్కౌంట్ ఇస్తున్నామని వ్యాపారి తెలిపారు.

కాలుష్యాన్ని తగ్గించేందుకు చాలామంది గ్రీన్ క్రాకర్స్‌ను కొంటున్నారు. పర్యావరణ హితమైన పటాకులను కొనేందుకు వినియోగదారులు మొగ్గు చూపుతున్నారని దుకాణదారులు చెబుతున్నారు. ధరలు పెరిగినా పిల్లల సంతోషం కోసం కొంత మొత్తంలోనే కొంటున్నామని కొనుగోలుదారులు అంటున్నారు.

చిన్నారులు పెద్దల పర్యవేక్షణలోనే టపాసులు కాల్చాలని నిపుణులు, వైద్యులు సూచిస్తున్నారు. జనావాసాలకు దూరంగా నిర్ణీత ప్రాంతాల్లోనే బాణసంచాను వినియోగించాలని వారు చెబుతున్నారు.