15 ఏళ్ల వయసులో 6 పావురాలతో మొదలై 500 పక్షులకు ఆశ్రయం ఇస్తున్న విజయవాడ రహీమ్

విజయవాడ ఆటో నగర్‌లో మెకానిక్‌గా పనిచేస్తున్న రహీమ్ 15 ఏళ్ల వయసులో 6 పావురాలతో స్నేహం మొదలుపెట్టారు. చెట్టుపై వాటికి గూడు ఏర్పాటు చేసి సంరక్షించడం మొదలుపెట్టిన ఆయన ప్రస్తుతం 500కు పైగా పావురాలను సాకుతున్నారు.

ఈ పక్షుల సేకరణలో అరుదైన జాతులు ఉన్నాయి. ఓల్డ్ జర్మన్ కూపర్, ఫ్రెంచ్ మౌంటైన్, రేసింగ్ హోమర్స్ వంటి పావురాలను ఆయన దేశంలోని పలు ప్రాంతాల నుంచి తెచ్చారు. రేసింగ్ హోమర్స్ పక్షులు కన్యాకుమారి నుంచి విజయవాడ వరకు 2000 కిలోమీటర్ల దూరాన్ని మూడు రోజుల్లో చేరుకున్న రికార్డు ఉందని రహీమ్ చెప్పారు.

పక్షుల పోషణకు నెలకు సుమారు రూ.15,000 నుంచి రూ.20,000 వరకు ఖర్చు అవుతుందని ఆయన తెలిపారు. ఈ ఖర్చును తన సొంత సంపాదన నుంచి భరిస్తూ, మిగతా మొత్తాన్ని కుటుంబ అవసరాలకు వినియోగిస్తున్నారు. రహీమ్ భార్య బట్టల దుకాణం నిర్వహిస్తూ ఆర్థికంగా సహకరిస్తున్నారు. కరోనా సమయంలో కూడా పక్షులకు ఎలాంటి లోటు రానివ్వలేదని కుటుంబ సభ్యులు చెప్పారు.

చుట్టుపక్కల వారు పావురాలు పెంచడం దరిద్రానికి సంకేతమని విమర్శించినా, రహీమ్ వాటిని కుటుంబ సభ్యులుగా భావిస్తారు. స్వాతంత్ర్య దినోత్సవం రోజున పక్షులను స్కూలుకు తీసుకెళ్లి జెండా ఆవిష్కరణలో పాల్గొంటారు. పక్షులు తమ రెక్కలతో స్పందించడం చూసి తనకు ఆనందం కలుగుతుందని రహీమ్ చెప్పారు.