విజయవాడ వాననీటి కాలువ పనులు ఇంకా అసంపూర్తి; వర్షం పడితే రోడ్లు జలమయం

విజయవాడ నగరంలో 2016లో మొదలైన వర్షం నీటి కాలువ నిర్మాణ ప్రాజెక్ట్ ఇప్పటికీ పూర్తి కాలేదు. ఫలితంగా చిన్న వర్షానికి కూడా రోడ్లు జలమయమవుతున్నాయి. మురుగు నీరు రోడ్లపైకి చేరి నగరవాసులు, వాహనదారులు ఇబ్బందులు పడుతున్నారు.

తెలుగుదేశం పార్టీ ప్రభుత్వ హయాంలో 2016లో ఈపీసీ పద్ధతిలో ఈ పనులు చేపట్టారు. నగరమంతటా 443 కిలోమీటర్ల మేర ప్రధాన, చిన్న డ్రైన్లు నిర్మించే ఈ ప్రాజెక్టుకు కేంద్రం నుంచి వన్ టైమ్ స్పెషల్ ఫైనాన్స్ అసిస్టెన్స్ కింద 461 కోట్ల రూపాయలు ఇచ్చింది. L&T సంస్థకు కాంట్రాక్ట్ ఇచ్చారు. 59 డివిజన్లలో ఒకేసారి ప్రారంభించిన ఈ పనులు మొదట 36 నెలల్లో పూర్తి చేయాలని అనుకున్నా, 2022 వరకు గడువు పొడిగించారు.

2019లో వైఎస్సార్ కాంగ్రెస్ పార్టీ ప్రభుత్వం ఏర్పడిన తర్వాత గుత్తేదారుకు బిల్లులు చెల్లించకపోవడంతో 2022లో పనులు నిలిచిపోయాయి. ప్రస్తుతం కొత్త ప్రభుత్వం ఏర్పడిన అనంతరం పనులు తిరిగి ప్రారంభమైనప్పటికీ, పురోగతి చాలా నెమ్మదిగా సాగుతోంది. బృందావన కాలనీలోని టికిల్ రోడ్‌లో డ్రైన్లను కలపకుండా పనులు మధ్యలో వదిలేశారు. బెంచ్ సర్కిల్ సమీపంలోని గాయత్రీ నగర్‌లో కాలువ రక్షణ గోడ కూలింది.

ఒకదానితో మరొకటి అనుసంధానం లేని డ్రైన్లు, అనేక చోట్ల అసంపూర్తి పనులతో నగరవాసులు అవస్థలు పడుతున్నారు. అధికారులు వేగంగా పనులు పూర్తి చేయించాలని ప్రజలు కోరుతున్నారు. చిన్న వర్షం వచ్చినా రోడ్లు మునిగిపోయి రాకపోకలు నిలిచిపోతుండడంతో శాశ్వత పరిష్కారం కోసం ఎదురుచూస్తున్నారు.