విశాఖ విమానాశ్రయం సేవలు నిలిపివేత; భోగాపురం ఎయిర్‌పోర్ట్ నుంచి విమానాలు ప్రారంభం

విశాఖపట్నం విమానాశ్రయం నుంచి షెడ్యూల్డ్ వాణిజ్య విమాన సర్వీసులు ఈ రాత్రి 12 గంటల నుంచి నిలిచిపోనున్నాయి. భోగాపురంలో కొత్తగా నిర్మించిన అల్లూరి సీతారామరాజు అంతర్జాతీయ విమానాశ్రయం నుంచి విమాన రాకపోకలు ప్రారంభం కానున్నాయి.

పౌర విమానయాన శాఖ ప్రకారం విశాఖ నుంచి షెడ్యూల్డ్ వాణిజ్య విమానాలను 30 ఏళ్ల పాటు నిలిపివేస్తున్నారు. అత్యవసర సందర్భాలు, రక్షణ దళాలు, పోలీసులు, ప్రభుత్వ అతిథులు, లీజు VIP విమానాలు, non-scheduled వాణిజ్య కార్యకలాపాలకు మినహాయింపు ఉంటుంది.

భోగాపురం ఎయిర్‌పోర్ట్ నుంచి IndiGo సంస్థ తొలిరోజు 31 సర్వీసులు నడపనుంది. హైదరాబాద్, ఢిల్లీ, ముంబై, చెన్నై, బెంగళూరు, కోల్‌కతా, తిరుపతి నగరాలకు ఈ విమానాలు వెళ్లనున్నాయి. రోజుకు 22 దేశీయ విమానాలతో పాటు అంతర్జాతీయ సర్వీసులు కూడా అందుబాటులోకి రానున్నాయి.

విశాఖ విమానాశ్రయం నాలుగున్నర దశాబ్దాలుగా ప్రయాణికులకు సేవలు అందించింది. 1941లో బ్రిటిష్ రాయల్ ఎయిర్ ఫోర్స్ కోసం ఇక్కడ చిన్న రన్వే నిర్మించారు. ఆ తర్వాత భారత నౌకాదళం దీన్ని విస్తరించింది. 2008లో ప్రత్యేక టెర్మినల్ అందుబాటులోకి వచ్చింది.

విశాఖ ఎయిర్‌పోర్ట్ తూర్పు నౌకాదళ ఆధ్వర్యంలోని INS డేగా ప్రాంగణంలో ఉంది. ఇక్కడ నేవీ, పౌర విమానాలు రెండూ ల్యాండ్ అయ్యేవి. 2014లో హుదూద్ తుఫాను సమయంలో విశాఖ టెర్మినల్ దెబ్బతింది.