విశాఖలో భూకంపం: సాగర్‌నగర్‌లో ప్రకంపనలు, తీవ్రత 4.5గా నమోదు

విశాఖపట్నంలోని సాగర్ నగర్, పెద్దవాల్తేరు ప్రాంతాల్లో గురువారం ఉదయం భూకంపం సంభవించింది. రిక్టర్ స్కేల్‌పై తీవ్రత 4.5 నుంచి 5 మధ్య నమోదైందని అధికారులు తెలిపారు. భూమి కొన్ని క్షణాలు మాత్రమే కంపించినప్పటికీ ప్రజలు భయంతో ఇళ్ల నుంచి బయటకు పరుగులు తీశారు.

కాకినాడకు 225 కిలోమీటర్ల దూరంలో బంగాళాఖాతంలో భూకంప కేంద్రాన్ని గుర్తించినట్టు సీస్మోలాజికల్ విభాగం తెలిపింది. ఉదయం 5 గంటల సమయంలో నార్త్ ఎక్స్‌టెన్షన్ ప్రాంతంలో అపార్ట్‌మెంట్లు కాసేపు ఊగినట్టు స్థానికులు చెప్పారు. చెట్లపై పక్షులు ఒక్కసారిగా ఎగిరిపోవడం గమనించినట్టు ఒక నివాసి తెలిపారు.

ప్రస్తుతానికి ఎలాంటి ప్రాణనష్టం, ఆస్తి నష్టం జరిగినట్టు సమాచారం లేదు. అధికారులు పరిస్థితిని సమీక్షిస్తున్నారు.