విశాఖ పాత విమానాశ్రయం సేవలు ముగింపు; భోగాపురం కొత్త ఎయిర్‌పోర్ట్‌కు షిఫ్ట్

విశాఖపట్నం అంతర్జాతీయ విమానాశ్రయం నుంచి చివరి వాణిజ్య విమానం ఆదివారం రాత్రి 10:45 గంటలకు బయలుదేరింది. ఢిల్లీకి వెళ్లిన ఈ విమానంతో ఇక్కడ సివిల్ విమాన రాకపోకలు ముగిశాయి.

ఐఎన్ఎస్ డేగా ఆవరణలో ఉన్న ఈ విమానాశ్రయం 40 ఏళ్లుగా సేవలు అందించింది. ఆదివారం అర్ధరాత్రితో వాణిజ్య సేవలు పూర్తిగా ఆగిపోయాయి. స్థానికులు, ప్రవాసాంధ్రులు చివరి రోజు విమానాశ్రయానికి వచ్చి సెల్ఫీలు దిగారు.

కొందరు ప్రయాణికులు 2007 నుంచి ఈ విమానాశ్రయాన్ని ఉపయోగిస్తున్నామని తెలిపారు. నగరానికి దగ్గరగా ఉండటంతో ప్రయాణాలు సౌకర్యంగా సాగాయని చెప్పారు. పాత విమానాశ్రయంతో తమకు చాలా అనుబంధం ఉందని వారు పేర్కొన్నారు.

అభివృద్ధిలో భాగంగా భోగాపురంలో కొత్త అంతర్జాతీయ విమానాశ్రయం అందుబాటులోకి రావడం పట్ల ప్రజలు సంతోషం వ్యక్తం చేశారు. పాత ఎయిర్‌పోర్ట్ తమ మదిలో శాశ్వతంగా నిలిచిపోతుందని విశాఖవాసులు తెలిపారు.