విశాఖపట్నం స్కూల్లో UKG విద్యార్థి మృతి; టీచర్ అదుపులో

విశాఖపట్నం కొత్త రోడ్డులోని లిటిల్ గార్డెన్ స్కూల్లో UKG విద్యార్థి ప్రణయ్ తేజ్ తరగతి గదిలో కుప్పకూలి మృతి చెందాడు. హోంవర్క్ చేయలేదని టీచర్ మందలిస్తుండగా ఈ ఘటన జరిగిందని కుటుంబ సభ్యులు తెలిపారు.

తల్లిదండ్రుల కథనం ప్రకారం, హోంవర్క్ చేయలేదని టీచర్ ప్రశ్నించారు. బాలుడు భయపడి ఏడుస్తుండగా టీచర్ చెంపదెబ్బ కొట్టినట్టు ఆరోపణ ఉంది. కాసేపటికే బాలుడు టీచర్ ముందే కుప్పకూలిపోయాడు. ఆసుపత్రికి తరలించగా అప్పటికే మృతి చెందినట్టు వైద్యులు తెలిపారు.

ఘటన దృశ్యాలు స్కూల్ CCTV కెమెరాల్లో రికార్డయ్యాయి. సమాచారం తెలిసిన కుటుంబ సభ్యులు స్కూల్ వద్దకు చేరుకుని ఆందోళన చేశారు. స్కూల్ యాజమాన్యం నిర్లక్ష్యం వల్లే కొడుకు మృతి చెందాడని తల్లి ఆరోపించారు. పోలీసులు వారికి నచ్చజెప్పే ప్రయత్నం చేశారు. బాలుడి మృతదేహాన్ని post-mortem కోసం కేజీహెచ్ ఆసుపత్రికి తరలించారు.

వన్ టౌన్ పోలీసులు టీచర్ను అదుపులోకి తీసుకున్నారు. తల్లిదండ్రుల ఫిర్యాదు ఆధారంగా విచారణ జరుగుతోందని పోలీసులు తెలిపారు. బాలుడి మృతికి కారణం టీచర్ మందలింపేనా అనేది దర్యాప్తులో తేలాల్సి ఉంది.

మంత్రి నారా లోకేష్ X వేదికగా స్పందించారు. బాలుడి కుటుంబానికి సానుభూతి తెలిపారు. స్కూల్ యాజమాన్యంపై చర్యలు తీసుకుంటామని, కుటుంబానికి ప్రభుత్వం అండగా ఉంటుందని అన్నారు.