మహిళా సాధికారతపై మంత్రి వివేక్ వెంకటస్వామి కీలక వ్యాఖ్యలు

తెలంగాణ రాష్ట్ర కార్మిక, ఉపాధి, శిక్షణ, కర్మాగారాలు, గనులు, భూగర్భ శాస్త్ర శాఖ మంత్రి గడ్డం వివేక్ వెంకటస్వామి మహిళా సాధికారతపై కీలక వ్యాఖ్యలు చేశారు. హైదరాబాద్‌లో జరిగిన ఓ మహిళా కార్యక్రమంలో ఆయన మాట్లాడారు.

గృహిణిగా ఉన్న మహిళలు కూడా నిశ్చయం ఉంటే వ్యాపారం, రాజకీయాల్లో రాణించగలరని ఆయన ఉదాహరణలతో వివరించారు. ఒక సాధారణ గృహిణిగా ఉన్న జాన్సీ వ్యాపారంలో విజయం సాధించి, తన కోడలిని కూడా విజయవంతమైన రాజకీయ నేతగా మార్చారని తెలిపారు. ఆమె కోడలు సైతం సాధారణ గృహిణిగా ఉండి, రాజకీయాలపై ఆసక్తి లేకపోయినా, అవకాశం వచ్చినప్పుడు దయాకర్ రావు వంటి పెద్ద నేతలను ఓడించి తన సామర్థ్యం నిరూపించుకుందని చెప్పారు.

తన భార్య కూడా గృహిణిగా ఉండి, విద్యా సంస్థ నిర్వహించే అవకాశం రావడంతో ప్రస్తుతం యూనివర్సిటీ ఏర్పాటుకు కృషి చేస్తున్నారని మంత్రి తెలిపారు. గతంలో కవిత కూడా సాధారణ గృహిణి అయినా, రాజకీయాలపై ఆసక్తితో ఎదిగారని ఉదాహరణగా చెప్పారు. మహిళలు నిశ్చయించుకుంటే ఏదైనా సాధించగలరని ఆయన ఉద్ఘాటించారు.

'గతంలో ప్రతి విజయవంతమైన పురుషుడి వెనుక ఒక మహిళ ఉంటుందనేవారు. ఇప్పుడు ప్రతి విజయవంతమైన మహిళ వెనుక ఒక పురుషుడు ఉండాలి' అని మంత్రి వివేక్ అన్నారు. పురుషులు మహిళల శక్తిని, వారి వృద్ధిని అంగీకరించి, వారి టైమింగ్స్, నిర్ణయాలకు అలవాటు పడాలని సూచించారు. తన ఇంట్లో ఇప్పుడు తాను బాస్ కాదని, తన భార్యే అన్ని నిర్ణయాలు తీసుకుంటుందని, తాను వాటిని పాటించడమే చేస్తున్నానని వ్యాఖ్యానించారు. ఈ విధంగా పురుషులు అంగీకరించినప్పుడే మహిళల అభివృద్ధి వేగవంతం అవుతుందని మంత్రి వివేక్ వెంకటస్వామి ఆ కార్యక్రమంలో పేర్కొన్నారు.