విజయనగరం కేజీబీవీ విద్యార్థినుల హాస్టల్ సమస్యలపై ఫిర్యాదు

విజయనగరం జిల్లా రాజం మండలం గురువాం గ్రామంలోని కస్తూరిబా గాంధీ బాలికల విద్యాలయం (కేజీబీవీ) హాస్టల్ విద్యార్థులు తమ సమస్యలను బయటపెట్టారు. మెగా పేరెంట్స్ అండ్ టీచర్స్ మీటింగ్‌లో భాగంగా విద్యార్థినులు తమ ఇబ్బందులను వివరించారు.

విద్యార్థినుల ప్రకారం, హాస్టల్‌లో అందించే ఆహారంలో పురుగులు ఉంటున్నాయి. అన్నం సరిగ్గా ఉడకడం లేదు లేదా మెత్తగా జావలా మారుతోంది. రాగి జావలో కూడా పురుగులు కనిపిస్తున్నాయని చెప్పారు.

డ్రైనేజీ సమస్యలు తీవ్రంగా ఉన్నాయి. వర్షం పడినప్పుడు డ్రైనేజ్ నీరు పైకి వస్తుంది. దీనివల్ల తరగతి గదుల్లో దుర్వాసన వస్తుంది. హాస్టల్‌లో ఐదు బాత్రూమ్‌లు ఉండగా, వాటిలో రెండు పనిచేయడం లేదు, ఒకటి స్టక్ అయింది, మరొక దానికి తలుపు లేదు. దాంతో ఒకే బాత్రూమ్‌పై ఆధారపడాల్సి వస్తోంది.

హాస్టల్ ప్రాంగణంలో చెత్తను గుంతలో పోసి నెల రెండు నెలలకు ఒకసారి కాలుస్తుండడంతో పొగతో ఆక్సిజన్ అందక ఇబ్బంది పడుతున్నామని విద్యార్థినులు చెప్పారు. తాగునీటి ట్యాంక్ శుభ్రం చేయకపోవడంతో అదే నీరు తాగాల్సి వస్తోందని ఆవేదన వ్యక్తం చేశారు.

విద్యార్థినులు తమ సమస్యలపై సిబ్బందికి చెప్పినా సరైన స్పందన లభించలేదని, అడిగితే కోప్పడతారని ఆరోపించారు. ఈ విషయంపై జిల్లా విద్యాశాఖ అధికారుల స్పందన తెలియాల్సి ఉంది.