విజయనగరం, మన్యం జడ్పీ చైర్మన్ పదవులపై సస్పెన్ష్ కొనసాగుతోంది

ఉమ్మడి విజయనగరం జిల్లాలోని రెండు జడ్పీ చైర్మన్ పదవులపై చర్చ కొనసాగుతోంది. విజయనగరం, పార్వతీపురం మన్యం జిల్లాల జడ్పీ చైర్మన్ స్థానాలకు ఎవరిని ఎంపిక చేస్తారన్నది ఇంకా స్పష్టం కాలేదు. ఈ పేర్లపై అధికారిక ప్రకటన రాలేదు.

విజయనగరం జడ్పీ చైర్మన్ స్థానం బీసీ జనరల్ మహిళకు కేటాయించారు. ఈ స్థానానికి మజ్జి సిరి సహస్ర పేరు ప్రధానంగా వినిపిస్తోంది. ఆమె జడ్పీటీసీగా ఎన్నికయ్యారు. మజ్జి సిరి సహస్ర తండ్రి మజ్జి శ్రీనివాస్ మాజీ ఎమ్మెల్యే. ఆయన వైసీపీ నుంచి టీడీపీలో చేరినట్లు వార్తలు వినిపిస్తున్నాయి.

అయితే ఆమె కుల అర్హతపై వివాదం తెరపైకి వచ్చింది. సిరి సహస్ర బీసీ వర్గానికి చెందినవారు కాదని పేర్కొంటూ వైసీపీ హైకోర్టును ఆశ్రయించింది. ఆమె కులాన్ని నిర్ధారించి నిర్ణయం తీసుకోవాలని హైకోర్టు కలెక్టర్‌ను ఆదేశించింది. దీంతో కలెక్టర్ తీసుకునే నిర్ణయం కీలకంగా మారింది.

జడ్పీ చైర్మన్ రేసులో మరో రెండు పేర్లు కూడా వినిపిస్తున్నాయి. నెల్లిమర్ల టికెట్ దక్కని మార్క్‌ఫెడ్ చైర్మన్ కర్రోతు బంగారు రాజు, తన కుమార్తె కర్రోతు చంద్రకళకు పదవి కట్టబెట్టేందుకు ప్రయత్నిస్తున్నట్లు ప్రచారం జరుగుతోంది. బొత్స అనూషను ఓడించిన పాశాల నీరజ పేరు కూడా చర్చలో ఉంది. కొప్పుల వేలమ సామాజిక వర్గం తమకూ స్థానం కేటాయించాలని కోరుతోందని ప్రచారం సాగుతోంది.

పార్వతీపురం మన్యం జిల్లా జడ్పీ చైర్మన్ పదవికి వైరిచర్ల వీరేష్ చంద్రదేవ్ పేరు ప్రధానంగా వినిపిస్తోంది. ఆయన అశోక్ గజపతి రాజు మేనల్లుడు. మాజీ కేంద్ర మంత్రి కిషోర్ చంద్రదేవ్ కుటుంబ సభ్యుడు కూడా. పార్టీ అధిష్టానం ఆయన వైపు మొగ్గు చూపుతోందని ప్రచారం జరుగుతోంది.

ఈ పేర్లపై పార్టీ అధిష్టానం నుంచి ఇంకా అధికారిక ప్రకటన రాలేదు. కుల అర్హతపై కలెక్టర్ నిర్ణయం, పార్టీ ప్రకటన తర్వాతే అభ్యర్థుల పేర్లు ఖరారు అవుతాయి.