విశాఖలో మధ్యతరగతికి అందుబాటు ధరల గేటెడ్ కమ్యూనిటీ హౌసింగ్ ప్రాజెక్టులు ప్రారంభం

విశాఖ మెట్రోపాలిటన్ రీజియన్ డెవలప్మెంట్ అథారిటీ (VMRDA) మధ్యతరగతి, ఐటీ ఉద్యోగుల కోసం రెండు అఫోర్డబుల్ గేటెడ్ కమ్యూనిటీ హౌసింగ్ ప్రాజెక్టులను ప్రారంభించింది. మిథిలాపురి VUDA కాలనీ, వేపగుంట ప్రాంతాల్లో ఈ ప్రాజెక్టులు చేపడుతున్నారు.

మిథిలాపురి VUDA కాలనీలో 2.78 ఎకరాల స్థలంలో 264 ఫ్లాట్లు నిర్మించనున్నారు. వీటిలో 96 ట్రిపుల్ బెడ్రూమ్, 88 2.5 బెడ్రూమ్, 80 డబుల్ బెడ్రూమ్ ఫ్లాట్లు ఉంటాయి. విస్తీర్ణం 800-1600 చదరపు అడుగుల వరకు ఉంటుంది. వేపగుంటలో 63 సెంట్ల స్థలంలో 45 ఫ్లాట్లు రానున్నాయి. మొత్తం ప్రాజెక్టు వ్యయం రూ.124 కోట్లుగా అంచనా.

పిపిపి పద్ధతిలో చేపట్టే ఈ ప్రాజెక్టుకు హైదరాబాద్‌కు చెందిన ఒక ప్రైవేట్ సంస్థతో VMRDA ఎంఓయు కుదుర్చుకుంది. ట్రిపుల్ బెడ్రూమ్ ఫ్లాట్లలో ఐటీ ఉద్యోగుల కోసం ప్రత్యేకంగా వర్కింగ్ స్పేస్ కల్పిస్తారు. మార్కెట్ ధరల కంటే తక్కువకే అన్ని సౌకర్యాలతో కూడిన గేటెడ్ కమ్యూనిటీ ఇవ్వాలన్నది ప్రణాళిక.

ముఖ్యమంత్రి చంద్రబాబు నాయుడు ఇటీవల విశాఖ పర్యటన సందర్భంగా అధికారులకు ఈ విధమైన అఫోర్డబుల్ హౌసింగ్ ప్రాజెక్టులు చేపట్టాలని సూచించారు. గతంలో చేసిన సర్వేలో ప్రజల నుంచి మంచి స్పందన వచ్చిందని అధికారులు తెలిపారు. ఈ ప్రాజెక్టు 15 ఏళ్ల విరామం తర్వాత VMRDA చేపట్టిన తొలి హౌసింగ్ ప్రాజెక్టు.

భీమిలి ఎమ్మెల్యే గంటా శ్రీనివాసరావు, VMRDA చైర్మన్ ప్రణవ్ గోపాల్ ప్రత్యేక పూజలతో శంకుస్థాపన చేశారు. మూడేళ్ల కాలపరిమితిలో ప్రాజెక్టు పూర్తి చేయాలని లక్ష్యం. VMRDA కార్యాలయానికి రోజుకు 50-60 విచారణలు వస్తున్నాయి. పూర్తయిన తర్వాత ఫ్లాట్లను వేలం ద్వారా విక్రయించనున్నారు.