వరంగల్ రైతులకు వర్షాభావం, తుఫాను ప్రభావం; పంట నష్టం భయం

వరంగల్ ఉమ్మడి జిల్లాలో ఈ ఖరీఫ్ సీజన్‌లో రైతులు తీవ్ర వర్షాభావ పరిస్థితులను ఎదుర్కొన్నారు. ఇప్పుడు తుఫాను ప్రభావంతో కురుస్తున్న వర్షాలు మిగిలిన పంటపై నష్టం తెస్తాయని ఆందోళన వ్యక్తమవుతోంది.

జిల్లాలో ప్రధానంగా వరి, పత్తి, మొక్కజొన్న, మిర్చి పంటలను ఎక్కువగా సాగు చేస్తారు. కొన్ని ప్రాంతాల్లో వరి కోతలు మొదలయ్యాయి. రైతులు ధాన్యాన్ని అమ్మకానికి తీసుకొస్తున్నారు. పత్తి, మొక్కజొన్న అమ్మకాల సీజన్ కూడా ప్రారంభమైంది.

సాగునీటి కొరతతో పంటలు ఎండిపోయాయి. కొంత భూమిని రైతులు పడావుగా పెట్టారు. ఆరు ఎకరాల పొలం ఉన్న ఒక రైతు జూన్, జూలైలో నాట్లు వేశామని తెలిపారు. సగం పంట ఎండిపోయిందని, విద్యుత్ సరిగా అందడం లేదని ఆయన చెప్పారు. మరో రైతు తన నాలుగు ఎకరాల పంటలో రెండు ఎకరాలు ఎండిపోయాయని తెలిపారు. చెరువు, కాలువ నీరు అందడం లేదని ఆయన వివరించారు. గత సంవత్సరం ఇదే కాలంలో మంచి వర్షాలు పడ్డాయని, ఈసారి వర్షాభావంతో పంటలు వేయలేదని మరో రైతు తెలిపారు.

ప్రస్తుతం జిల్లాలో 70 శాతానికి పైగా వరి పంట ఇంకా కోత దశలోనే ఉంది. కోసిన ధాన్యాన్ని రోడ్లపై, ఖాళీ స్థలాల్లో ఆరబోస్తున్నారు. ముసురు, చలి వాతావరణం వల్ల వరి, పత్తి పంటల నాణ్యత దెబ్బతింటుందని రైతులు ఆందోళన చెందుతున్నారు. ధాన్యానికి మంచి ధర ఉంటుందని భావించినా, ఒక్కసారిగా వాతావరణం మారడంతో ఫలితం తెలియక గందరగోళంలో ఉన్నారు. పెట్టిన పెట్టుబడి రాదని పలువురు రైతులు ఆందోళన వ్యక్తం చేస్తున్నారు.

భారీ వర్షాలు పడతాయని వాతావరణ శాఖ హెచ్చరిక ఇచ్చింది. అయితే ఇప్పటివరకు భారీ వర్షాలు కురవలేదు. దీంతో రైతులు కొంత ఊపిరి పీల్చుకున్నారు. పంట అమ్మకం పూర్తయ్యే వరకు వాతావరణం అనుకూలించాలని రైతులు కోరుతున్నారు.