భారీ వర్షాలతో ఖరీఫ్ పంటల్లో తెగుళ్లు: శాస్త్రవేత్త సూచనలు

ఇటీవలి భారీ వర్షాల కారణంగా ఆంధ్రప్రదేశ్, తెలంగాణ రాష్ట్రాల్లో ఖరీఫ్ పంటలు నీట మునిగాయి. వరి, మొక్కజొన్న, పత్తి, సోయాచిక్కుడు, అపరాలు తదితర పంటలకు తెగుళ్లు సోకే ప్రమాదం పెరిగింది. వరంగల్ ప్రాంతీయ వ్యవసాయ పరిశోధన స్థానం శాస్త్రవేత్త పద్మజా, ఈ పరిస్థితుల్లో పాటించాల్సిన యాజమాన్య పద్ధతులను వివరించారు.

వరి పంటలో బ్యాక్టీరియా ఆకుమచ్చ ఎండు తెగులు, పాంపోడ తెగులు ఎక్కువగా కనిపిస్తాయని ఆమె తెలిపారు. బ్యాక్టీరియా ఆకుఎండు తెగుళ్లకు కాపరాక్సీ క్లోరైడ్ 3 గ్రాములు, ప్లాంటామైసిన్ లేదా అగ్రిమైసిన్ వంటి బ్యాక్టీరియానాశకాలను పిచికారి చేయాలి. పాంపోడ తెగులు నివారణకు ప్రొపికోనజోల్ 1 ml లేదా వాలిడామైసిన్ 2 ml లేదా హెగ్జాకోనజోల్ 2 ml లీటరు నీటిలో కలిపి పిచికారి చేయాలని సూచించారు.

మొక్కజొన్నలో బ్యాక్టీరియా కాండం కుళ్ళు తెగులు 20-25, 40 రోజుల పంట దశలో కనిపిస్తుంది. కాండం కుళ్లి పసుపు రంగు జిగురు పదార్థం స్రవిస్తే, 35% క్లోరిన్ ఉన్న బ్లీచింగ్ పౌడర్ను ఎకరాకు 4 కిలోల చొప్పున నీటిలో కలిపి మొక్క కాండాలు తడిసేలా పిచికారి చేయాలి.

పత్తిలో నీటి ముంపు ప్రాంతాల్లో మొక్కలు గుంపులుగా చనిపోతుంటే, కార్బండాజిమ్ 1 గ్రాము లేదా కాపరాక్సీ క్లోరైడ్ 3 గ్రాములు లీటరు నీటిలో కలిపి మొక్కల మొదలు తడిసేలా పోయాలి. చనిపోయిన మొక్కలను తీసివేయాలి. సోయాచిక్కుడులో వేరుకుళ్లు తెగులు రాకుండా కాపరాక్సీ క్లోరైడ్ 3 గ్రాములు లీటరు నీటికి కలిపి మొక్క చుట్టూ పిచికారి చేయాలి. తెల్లదోమ నివారణకు డైఫెంతురాన్ లేదా ఎసిఫేట్ వాడాలి.

అపరాలైన పెసర, మినుములో ఆకుమచ్చ తెగుళ్లకు హెక్సాగోనజోల్ 1 ml లేదా అజాక్సిస్ట్రాబిన్ 1 ml లీటరు నీటికి కలిపి పిచికారి చేయాలి. కందిలో ఫైటాఫ్తొరా ఎండు తెగులు వస్తే, మెటలాక్జిల్ 2 గ్రాములు లీటరు నీటికి కలిపి మొక్క కాండం, వేరు తడిసేలా పిచికారి చేయాలి. వైరస్ తెగులు (గుడ్డు మూతి తెగులు) కనిపిస్తే, వెటబుల్ సల్ఫర్ 3 గ్రాములు లేదా ఫెరమ్ పెరాక్సిమైట్ సెగేట్ 1 ml లీటరు నీటికి కలిపి ముందస్తు పిచికారి చేయాలి.

ఈ చర్యలు చేపట్టడం వల్ల తెగుళ్లను సమర్థంగా నివారించవచ్చని శాస్త్రవేత్త తెలిపారు. రైతులు తగిన జాగ్రత్తలు తీసుకోవాలని సూచించారు.